У Гродне сілавікі знайшлі нелегальную майстэрню дронаў

6 жніўня, Позірк. Гараж з метэазондамі і нелегальную майстэрню для вытворчасці дронаў знайшлі аператыўныя супрацоўнікі Гродзенскай пагранічнай групы, паведамляе ДПК.

Аперацыя праведзена ва ўзаемадзеянні з крымінальным вышукам, падатковымі органамі, АБЭЗ і спецназам МУС

“Падчас правядзення ператрусу ў гаражы ў Гродна 4 жніўня знойдзена і канфіскавана 10 метэазондаў, 10 GPS-трэкераў, фотапасткі і мабільныя тэлефоны”, — гаворыцца ў рэлізе.

У далейшым “праваахоўнікі ўстанавілі асобу яшчэ аднаго грамадзяніна Беларусі, датычнага да супрацьпраўнай дзейнасці”.

Канфіскавана восемь беспілотнікаў, якія знаходзяцца на стадыі зборкі, пульты кіравання і іншыя камплектуючыя для вырабу і рамонту БПЛА.

“Прызначаны шэраг экспертыз. Праводзяцца далейшыя сумесныя аператыўна-вышуковыя мерапрыемствы па спыненні злачыннай дзейнасці”, — паведамілі ў ДПК.

Пры гэтым аб узбуджэнні крымінальнай справы інфармацыі няма.

Падобнае абсталяванне выкарыстоўваецца для дастаўкі кантрабанды ў ЕС, як правіла, цыгарэт.

Напярэдадні паведамлялася, што ў раёне в. Прывалка каля беларуска-літоўскай мяжы (Гродзенскі раён) 2 жніўня памежнікі затрымалі грамадзяніна Беларусі з “абсталяваннем для ажыццяўлення супрацьпраўнай дзейнасці“: “На месцы затрымання ў гаспадарчых пабудовах былі знойдзены 50 балонаў з газам, 18 аэрастатычных шароў і 12 GPS-.

Знойдзеныя прадметы канфіскаваны і дастаўлены ў Гродзенскую пагранічную групу. У адносінах да мужчыны распачаты адміністрацыйны працэс за парушэнне памежнага рэжыму.

За першую палову 2025 года ў Літве затрымана і канфіскавана больш за 805 тыс. пачкаў кантрабандных цыгарэт, дастаўленых з Беларусі па паветры.

У 2024 годзе і першай палове 2025-га было распачата 20 дасудовых расследаванняў па фактах перавозкі кантрабанды пры дапамозе метэазондаў ці дронаў.

“У агульнай складанасці 34 асобам прад’яўлены абвінавачанні ў рамках дасудовага расследавання такога кшталту. Яшчэ адным значным вынікам гэтага года сталі дзесяць крымінальных спраў, якія цяпер разглядаюцца або ўжо разгледжаны ў судах”, — паведамляла літоўская пракуратура.