Беларусь зноў заняла другое месца ў ЕАЭС па кошце бензіну

13 жніўня, Позірк. У другім квартале 2025 года Беларусь заняла 2-е месца ў Еўразійскім эканамічным саюзе (ЕАЭС) па кошце бензіну, вынікае з праведзенага “Позіркам” аналізу штоквартальных даных аддзела галіновай і сацыяльна-дэмаграфічнай статыстыкі Еўразійскай эканамічнай камісіі (ЕЭК).

Па выніках першага квартала 2025 года Беларусь таксама знаходзілася на 2-м месцы. У 2024 годзе Беларусь па выніках студзеня — сакавіка была 2-й, студзеня — чэрвеня, ліпеня — верасня, кастрычніка — снежня — 3-й.

Найбольш дарагі бензін сёлета ў чэрвені быў у Арменіі — 1,27 долара за літр (1,35; -5,9% да сакавіка). Далей Беларусь— 0,86 (0,77%; +11,7%), Расія— 0,77 (0,69; +11,6%), Кыргызстан-0,76 (0,74; +2,7%) Казахстан — 0,41 (0,41).

Дызельнае паліва найбольш дарагое ў Арменіі — 1,27 долара (1,32; -3,8%). Далей Расія — 0,91 (0,82; +11%), Беларусь— 0,87 (0,78; +11,5%), Кыргызстан— 0,84 (0,83; +1,2%), Казахстан — 0,60 (0,60).

У чэрвені 2025 года сярэднія спажывецкія цэны перавышалі сярэднія цэны вытворцаў на бензін у Расіі ў 2,3 раза, Казахстане — у 1,6 раза, Беларусі — у 1,5 раза, у Кыргызстане — на 34,9%; на дызельнае паліва — у Расіі — у 2,1 раза, Казахстане — у 1,5 раза, Беларусі — на 35,1%, у Кыргызстане — на 15,2%.

3 траўня рознічныя цэны на маторнае паліва на беларускіх аўтазаправачных станцыях былі павялічаныя на дзве капейкі. Гэта было апошняе, восьмае, павышэнне ў рамках раней абвешчанай пакрокавай стратэгіі дзяржаўнага канцэрна “Белнафтахім”.

Цяпер цэны за адзін літр складаюць:

бензін АІ-92-К5-Еўра — 2,50 рубля;

АІ-95-К5-Еўра — 2,60 рубля;

АІ-98-К5-Еўра — 2,82 рубля;

дызельнае паліва — 2,60 рубля.