МЗС “рашуча асудзіла” таксама высылку дыпламата з Польшчы

9 верасня, Позірк. Міністэрства замежных спраў “рашуча асуджае беспадстаўнае рашэнне польскіх уладаў аб высылцы беларускага дыпламата”, гаворыцца ў апублікаванай 9 верасня заяве беларускага знешнепалітычнага ведамства.

МЗС назвала рашэнне Варшавы “элементам скаардынаванай з чэшскім бокам правакацыйнай палітыкі ў адрас беларускай дзяржавы з мэтай далейшага нагнятання напружанасці як у міждзяржаўных адносінах, так і ў рэгіёне агулам”.

“Гэтыя меры не застануцца без адказу. Рашэнне беларускага боку будзе абнародавана ў найбліжэйшы час”, — заяўляе міністэрства.

Прэм’ер-міністр Польшчы Дональд Туск пацвердзіў 9 верасня інфармацыю аб затрыманні Агенцтвам унутранай бяспекі грамадзяніна Беларусі. Паводле яго слоў, затрыманне стала вынікам супрацоўніцтва са спецслужбамі “у тым ліку Румыніі і Чэхіі”.

“Таксама з Польшчы будзе высланы беларускі дыпламат, які падтрымліваў агрэсіўныя дзеянні беларускіх спецслужбаў супраць нашай краіны”, — напісаў Туск.

Пра раскрыццё шпіёнскай сеткі Мінска ў выніку сумеснай працы са спецслужбамі Венгрыі і Румыніі Служба бяспекі і інфармацыі (контрвыведка) Чэхіі паведаміла 8 верасня.

У той жа дзень МЗС краіны інфармавала, што беларускага дыпламата, які працаваў на спецслужбы, прызналі персонай нон грата. “Мы не пацерпім злоўжыванні дыпламатычным прыкрыццём у мэтах шпіянажу”, — падкрэслілі ў ведамстве.

У дыпламата ёсць 72 гадзіны, каб пакінуць Чэхію, паведаміла расійская служба Чэшскага радыё.

9 верасня беларуская рэдакцыя “Радыё Свабода”, якая працуе ў Празе, аналізуючы дыпламатычны даведнік МЗС Чэхіі, прыйшла да высновы, што згаданым дыпламатам, відаць, з’яўляецца дарадца па адміністрацыйных пытаннях беларускай амбасады Мікалай Дукшта.

8 верасня СМІ паведамлялі, што ў полі зроку спецслужбаў падчас міжнароднай контрвыведніцкай аперацыі трапіў і беларус, які жыве ў Польшчы.

“Гэты чалавек, які пражывае недалёка ад польска-беларускай мяжы, працуе таксістам і з’яўляецца сябрам беларускай апазіцыі. Роля таксіста цікавая, паколькі ён трапіў у поле зроку спецслужбаў праз беларускіх выведнікаў, з якімі Балан сустракаўся ў Будапешце”, — адзначалі медыя.

9 верасня выданне Wiadomosci паведаміла са спасылкай на інфармацыю міністра-кардынатара спецслужбаў Томаша Семоняка, што пракурор Мазавецкага аддзялення Нацыянальнай пракуратуры ў Варшаве прад’явіў затрыманаму абвінавачанне ў здзяйсненні злачынства, прадугледжанага ч. 1 арт. 111 Крымінальнага кодэкса і падаў у суд хадайніцтва пра абранне яму меры стрымання ў выглядзе ўзяцця пад варту тэрмінам на тры месяцы.

Паведамляецца, што ў МЗС быў выкліканы часовы павераны ў справах Беларусі ў Польшчы, якому заяўлена пра пазбаўленне дыпламатычнай акрэдытацыі і аб’яўленне персонай нон грата ў Польшчы беларускага дыпламата, які непасрэдна займаўся выведніцкай дзейнасцю.

Згодна з дыпламатычным даведнікам МЗС Польшчы на 1 жніўня 2025 года, часовым павераным у справах Беларусі ў краіне з’яўляецца Аляксей Панкраценка, іншыя супрацоўнікі пасольства ў даведніку не пазначаны.

Як адзначаў “Позірк”, хутчэй за ўсё, высылцы падлягае дыпламат, які адказвае за адміністрацыйныя пытанні. Як правіла, такі супрацоўнік займае пасаду дарадцы, камандзіруецца Камітэтам дзяржбяспекі.

9 верасня МЗС Беларусі “рашуча асудзіў” прызнанне персонай нон грата супрацоўніка амбасады ў Чэхіі і заявіў, што Мінск пакідае за сабой права “прыняць меры ў адказ у адпаведнасці з прынцыпам узаемнасці і абароны нацыянальных інтарэсаў”.