У асяроддзі Статкевіча лічаць “вельмі верагодным” яго вяртанне ў глыбоцкую калонію

15 верасня, Позірк. Верагоднасць таго, што Мікалая Статкевіча вернуць у калонію ў Глыбокім, “вельмі вялікая”, заявіла “Позірку” крыніца, блізкая да асяроддзя палітыка. З меркаванняў бяспекі яна пажадала застацца не названай.

Крыніца пракаментавала інфармацыю сайта “Наша ніва”, атрыманую ад “вартай даверу крыніцы”, што Статкевіч “знайшоўся ў калоніі Глыбокага”: “Нам пра гэта нічога не вядома. Што да аператыўнасці атрымання інфармацыі “надзейных крыніц”, то варта ўзгадаць, што два гады і сем месяцаў інкамунікада ніводнае СМІ, незалежнае ці залежнае, не атрымала ніякай інфармацыі пра Мікалая. “Надзейныя крыніцы” — гэта хутчэй за ўсё ГУБАЗіК [МУС] альбо КДБ”.

Статкевіч, затрыманы ў траўні 2020 года і асуджаны на 14 гадоў пазбаўлення волі, быў вызвалены 11 верасня разам з групай іншых зняволеных (агулам 52, з іх 40 палітычных) у межах здзелкі паміж адміністрацыяй прэзідэнта ЗША Дональда Трампа і Аляксандра Лукашэнкі. Умовай вызвалення быў выезд вязняў з краіны. Статкевіч адмовіўся эміграваць у Літву, куды павезлі групу, і вярнуўся на беларускую тэрыторыю. У другой палове дня 11 верасня яго зафіксавалі камеры відэаназірання на беларуска-літоўскай мяжы паміж пунктамі пропуску Каменны Лог і Мядзінінкай. З таго часу пра яго лёс дакладнай інфармацыі няма. Да вызвалення ўтрымліваўся у папраўчай калоніі № 13 у Глыбокім (Віцебская вобласць).