Затрыманым у Варшаве беларусам каля 20 гадоў, запушчаны імі ў забароненай зоне дрон быў прыземлены за некалькі хвілін

15 верасня, Позірк. Нейтралізацыя беспілотнага лятальнага апарата над урадавымі будынкамі ў Варшаве заняла некалькі хвілін, паведаміў тэлеканалу TVN24 прэс-сакратар Службы дзяржаўнай аховы Польшчы Багуслаў Пяркоўскі.

Паводле яго слоў, інцыдэнт здарыўся 15 верасня каля 19 гадзін.

“Афіцэры Службы дзяржаўнай аховы, якія дзяжурылі пры Бельведэры (прэзідэнцкім палацы. — “Позірк”.), заўважылі лятаючы беспілотнік, апавясцілі сваіх кіраўнікоў. Затым туды быў адпраўлены патруль для нейтралізацыі, гэта значыць для затрымання аператараў дрона. Паліцэйскія затрымалі двух чалавек”, — сказаў Пяркоўскі.

Ён патлумачыў, што над урадавымі будынкамі ў Варшаве дзейнічае “забароненая для беспілотнікаў зона”, выкарыстоўваць БПЛА там не дазволена.

Прадстаўнік Службы дзяржаховы адзначыў, што “падчас інцыдэнту не было зроблена ніводнага стрэлу”, “дрон вярнуўся ў аварыйным рэжыме да аператараў”.

Паводле звестак партала Onet, двум грамадзянам Беларусі, затрыманым за выкарыстанне БПЛА ў забароненай зоне, каля 20 гадоў.

Аб прымусовым прызямленні ў Варшаве беспілотнага лятальнага апарата паведаміў у сацсетцы Х 15 верасня прэм’ер-міністр Польшчы Дональд Туск.

Паводле яго слоў, БПЛА быў “нейтралізаваны” супрацоўнікамі Службы дзяржаўнай аховы, дрон лётаў на ўрадавымі будынкамі і рэзідэнцыяй прэзідэнта Польшчы.

“Затрыманыя двое грамадзян Беларусі. Паліцыя расследуе абставіны інцыдэнту”, — адзначыў Туск.