23 верасня, Позірк. “Закрыццё мяжы як інструмент застаецца ў распараджэнні” Варшавы, у выпадку неабходнасці — калі “ўзмоцніцца напружанасць або агрэсіўныя паводзіны некаторых суседзяў” — урад “не будзе вагацца” і зноў спыніць рух транспарту праз пункты пропуску, заявіў 23 верасня прэм’ер-міністр Польшчы Дональд Туск.
“Завяршэнне манеўраў “Захад-2025″ змяншае — не скажу, што цалкам ліквідуе, але змяншае — розныя віды пагроз, звязаных з агрэсіўнай пазіцыяй нашых усходніх суседзяў”, — цытуе Туска прэс-служба яго канцылярыі.
Паводле слоў прэм’ера, рашэнне пра адкрыццё мяжы прынята з улікам “эканамічных інтарэсаў польскіх перавозчыкаў”.
Закрыццё мяжы, дадаў кіраўнік урада, “выканала сваю задачу”. Прычыны, якія сталі падставай для такіх мер, “зніклі”, падкрэсліў Туск.
Раней прэм’ер-міністр Польшчы паведаміў, што мяжа з Беларуссю будзе адкрыта апоўначы 25 верасня (1:00 па беларускім часе). Гаворка ідзе як пра чыгуначныя, так і пра аўтамабільныя пункты пропуску.
Польшча закрыла ўсе кантрольна-прапускныя пункты на мяжы з Беларуссю, уключаючы адзіны дзейны для пропуску легкавых аўтамабіляў КПП Цярэспаль (Брэст), 12 верасня — у першы дзень беларуска-расійскіх стратэгічных вучэнняў “Захад-2025”, якія і сталі нагодай для такога рашэння.
У апошні дзень манеўраў, 16 верасня, стала вядома, што Варшава па заканчэнні вучэнняў не адкрыла мяжу.
Польскія ўлады паведамілі, што рашэнне аб закрыцці мяжы “дзейнічае да далейшага паведамлення і прадыктавана клопатам пра бяспеку грамадзян Польшчы”.
21 верасня Міністэрства абароны Беларусі паведаміла, што расійскія вайскоўцы, якія бралі ўдзел у сумесных стратэгічных вучэннях “Захад-2025”, пакінулі тэрыторыю Беларусі.
