Кіраўнік урада Кыргызстана прыбыў у Беларусь, анансаваная яго сустрэча з Лукашэнкам

28 верасня, Позірк. Старшыня Кабінета міністраў — кіраўнік Адміністрацыі прэзідэнта Кыргызстана Адылбек Касымаліеў прыбыў у Беларусь з афіцыйным візітам, паведамляе прэс-служба кыргызскага ўрада.

У Нацыянальным аэрапорце Мінск яго сустрэў намеснік прэм’ер-міністра Беларусі Анатоль Сівак.

Адзначаецца, што Касымаліеў сустрэнецца з Аляксандрам Лукашэнкам і прэм’ерам Аляксандрам Турчыным.

“Па выніках перамоў кіраўнікоў урадаў будзе падпісаны шэраг міжнародных дакументаў, накіраваных на далейшае развіццё і ўмацаванне двухбаковага супрацоўніцтва. Таксама ў рамках візіту кіраўнік Кабміна наведае шэраг аб’ектаў”, — гаворыцца ў паведамленні.

Таксама Касымаліеў будзе ўдзельнічаць 29–30 верасня ў пасяджэннях Савета кіраўнікоў урадаў Садружнасці Незалежных Дзяржаў і Еўразійскага міжурадавага савета.

Акрамя таго, анансаванае яго выступленне на пленарным пасяджэнні міжнароднай прамысловай выставы “Інапрам. Беларусь”.

31 жніўня Лукашэнка павіншаваў з Днём незалежнасці прэзідэнта Кыргызстана Садыра Жапарава, падкрэсліўшы, што “за мінулыя дзесяцігоддзі Бішкек стаў значным партнёрам Мінска, у тым ліку на інтэграцыйных пляцоўках і ў міжнародных арганізацыях”.

Пры гэтым афіцыйны Мінск ігнаруе запыты кыргызскай генпракуратуры аб выдачы былога прэзідэнта Кыргызстана Курманбека Бакіева, які атрымаў палітычны прытулак у Беларусі ў 2010 годзе, завочна прыгаворанага на радзіме ўжо да некалькіх доўгіх тэрмінаў пазбаўлення волі па справах, звязаных з карупцыяй.

Беларусь і Кыргызстан з’яўляюцца партнёрамі ў рамках Еўразійскага эканамічнага саюза і Садружнасці Незалежных Дзяржаў, а таксама саюзнікамі ў Арганізацыі Дагавора аб калектыўнай бяспецы.

У канцы жніўня 2023 года дзяржаўныя СМІ паведамлялі, што па выніках 2022 года тавараабарот паміж Беларуссю і Кыргызстанам перавысіў 160 млн долараў.

Паводле даных МЗС, тавараабарот Беларусі з Кыргызстанам у 2021 годзе склаў 97,1 млн долараў (беларускі экспарт — 86,2 млн).