Лукашэнка зноў выступіў за прыцягненне ў Беларусь працоўных мігрантаў
4 кастрычніка, Позірк. За прыцягненне ў Беларусь працоўных мігрантаў у чарговы раз выступіў Аляксандр Лукашэнка, наведваючы 4 кастрычніка Петрыкаўскі раён (Гомельская вобласць).
Палітыку, паводле інфармацыі яго прэс-службы, паведамілі, што мясцовае сельскагаспадарчае прадпрыемства прыцягвае ў тым ліку замежнікаў.
Лукашэнка нагадаў, што “адказнасць у пытанні прыцягнення працоўных мігрантаў з-за мяжы ляжыць на кіраўніках прадпрыемстваў і арганізацый”. Кіраўнікі гаспадарак самі мусяць вырашаць, “каго і колькі неабходна прыцягнуць”.
Пры гэтым, паводле слоў Лукашэнкі, лепш, каб “прыязджалі адразу сем’ямі”, паколькі “тады і стаўленне да працы, адказнасць зусім іншыя”.
“Да іх (працоўных мігрантаў. — “Позірк”.) трэба ставіцца, як да сваіх людзей. І дзетак навучаць, і лячыць людзей трэба. <…> Таму трэба арыентавацца, асабліва на нашыя [постсавецкія] рэспублікі. Гэта ж нашы людзі”, — сказаў ён.
У жніўні 2025 года ў беларускай эканоміцы было занята 4 млн 156,2 тыс. чалавек — на 8,2 тыс. больш, чым у ліпені (4 млн 148 тыс.; +0,2%), паказаў праведзены “Позіркам” аналіз апошніх адпаведных даных Нацыянальнага статыстычнага камітэта.
Пры гэтым, паводле даных Дзяржаўнай службы занятасці, на 4 кастрычніка на рынку працы Беларусі налічваецца 175.675 вакансій.
За апошнія пяць гадоў на беларускім рынку працы колькасць свабодных месцаў павялічылася ў 1,93 раза (з 83.571 у 2019-м да 161.281 у 2024-м), паказаў праведзены “Позіркам” аналіз даных Белстата.
11 красавіка 2025 года Лукашэнка па выніках сустрэчы ў Мінску з кіраўніком урада Пакістана Шахбазам Шарыфам заявіў, што краіны дамовіліся выпрацаваць механізм прыезду ў Беларусь пакістанскіх працоўных мігрантаў. Паводле яго слоў, Беларусь гатовая прыняць 100–150 тыс. спецыялістаў.
Каментуючы на наступны дзень гэтую дамоўленасць, ён паведаміў, што Беларусь зацікаўленая “перш за ўсё ў прыцягненні спецыялістаў, а не проста моладзі”. “І лепш — сем’ямі. Калі сям’я прыехала, яны працаваць будуць”, — сказаў ён.
Праз два тыдні, 25 жніўня, Лукашэнка заявіў, што мігранты з розных краінаў павінны быць раззасяроджаныя па тэрыторыі Беларусі, і паўтарыў, што акцэнт будзе рабіцца на тым, каб запрашаць цэлыя сем’і. “З тысячы чалавек будуць у нас, напрыклад, 60 або 100 чалавек замежнікаў. Гэта нармальная практыка. А наогул у нас працоўных рэсурсаў увогуле дастаткова. А дзе не хапае, мы навучым кожнага чалавека і возьмем яго жыць”, — адзначыў ён у кантэксце перспектывы прыезду пакістанскіх мігрантаў.
Гэтыя планы выклікалі неадназначную рэакцыю ў грамадстве, якая, у сваю чаргу, выклікала негатыўную рэакцыю беларускіх уладаў.
Паводле даных Парламенцкай асамблеі Савета Еўропы, ад 200 да 500 тыс. чалавек пакінула Беларусь пасля падзей жніўня 2020 года. Упраўленне вярхоўнага камісара ААН па правах чалавека называла меншую лічбу — 100 тыс. У лютаўскім дакладзе Групы незалежных экспертаў ААН па становішчы ў галіне правоў чалавека ў Беларусі гаварылася, што з краіны за гэты час магло з’ехаць да 600 тыс. грамадзян.
