Лукашэнка пахваліў педагогаў, дзякуючы якім “моладзь вучыцца ацэньваць перспектывы сучаснага светапарадку”

5 кастрычніка, Позірк. “У эпоху імклівага інавацыйнага развіцця” роля педагога “вялікая як ніколі”, заявіў Аляксандр Лукашэнка з нагоды Дня настаўніка, які адзначаецца ў першую нядзелю кастрычніка.

“Ваша служэнне — гэта карпатлівая штодзённая праца, якая патрабуе не толькі бездакорнага валодання прадметам і методыкай яго выкладання, але і вялізнага цярпення, памножанага на душэўную шчодрасць”, — цытуе віншавальніка яго прэс-служба.

Паводле слоў Лукашэнкі, дзякуючы “прафесіяналізму і адказнаму падыходу” настаўнікаў “да любімай справы моладзь вучыцца правільна і справядліва расстаўляць жыццёвыя прыярытэты, аналізаваць вялікія аб’ёмы інфармацыі і ацэньваць перспектывы сучаснага светапарадку, паспяхова прымяняючы атрыманыя веды і навыкі”.

“Вы аб’ядноўваеце сям’ю і школу для дасягнення агульных мэт — умацавання ў нашых дзяцей любові да радзімы і фарміравання пачуцця датычнасці да яе будучыні”, — адзначыў аўтар віншавання.

Пасля падзей 2020 года сфера адукацыі зведала значныя змены. У навучальных праграмах сярэдняй школы істотна вырас ідэалагічны складнік, у дзецях выхоўваецца лаяльнасць да ўлады. Пры гэтым у педагагічнай галіне былі праведзеныя кадравыя чысткі, масава звальняліся настаўнікі, якія не падтрымліваюць Лукашэнку, якія аддалі подпіс за іншых кандыдатаў перад выбарамі 2020-га.

Паводле слоў дарадцы Святланы Ціханоўскай па навуцы і адукацыі Паўла Церашковіча, больш за 6 тыс. настаўнікаў пазбавілася працы з-за рэпрэсій, звыш 50 чалавек прайшло “праз пекла катаванняў у калоніях і на “хіміі”, некаторыя і цяпер знаходзяцца за кратамі”.

Сёлета ўлетку ў Беларусі былі прынятыя папраўкі ў закон аб “забеспячэнні правоў дзяцей”, якія, сярод іншага прадугледжваюць пазбаўленне права займацца педагагічнай дзейнасцю асоб, якія “здзейснілі злачынствы экстрэмісцкай накіраванасці”. Аляксандр Лукашэнка падпісаў адпаведны дакумент 12 ліпеня. 

“Экстрэмісцкія” артыкулы Крымінальнага кодэкса пасля падзей 2020 года актыўна выкарыстоўваюцца ўладамі для палітычнага пераследу грамадзян.

Група спецыяльных дакладчыкаў ААН сёлета напрыканцы лютага звярнулася да ўрада Беларусі з той нагоды, што згаданы законапраект тады быў прыняты ў першым чытанні.

Эксперты нагадалі, што расплывісты і празмерна шырокі тэрмін “экстрэмізм” не мае пад сабой абавязковых норм міжнароднага права і, калі ён ужываецца ў якасці крымінальна каральнай катэгорыі, несумяшчальны з прынцыпам прававой дакладнасці, прадугледжаных арт. 15 Міжнароднага пакта аб грамадзянскіх і палітычных правах.

Міністр адукацыі Андрэй Іванец 29 верасня на прэс-канферэнцыі ў Мінску заявіў, што сярэдні заробак настаўніка “наблізілася да 100% ад сярэдняга заробку па краіне, тады як тры гады таму складаў ад яе 72–75%”.

Паводле даных Нацыянальнага статыстычнага камітэта, намінальны налічаны сярэдні заробак работнікаў Беларусі ў жніўні 2025 года склаў 2.762,7 рубля — на 9,7 рубля менш (-0,3%), чым у ліпені (2.772,4). У сферы адукацыі — 1.766,1 (1.864,2; -5,3%).

Паводле даных Мінадукацыі, у Беларусі працуе каля 114 тыс. педагагічных работнікаў, навучаецца 1 млн 50 тыс. чалавек. На аднаго настаўніка прыходзіцца 10–11 вучняў.