За атрыманне хабару ўзбуджаная крымінальная справа ў дачыненні да галоўнага інжынера сельгаспрадпрыемства
5 кастрычніка, Позірк. Аб узбуджэнні крымінальнай справы ў дачыненні да службовай асобы сельскагаспадарчай арганізацыі ў Мінскай вобласці паведамляе прэс-служба Міністэрства ўнутраных спраў.
Супрацоўнікамі ведамства “выяўлены факт атрымання хабару”, адзначаецца ў рэлізе.
“Устаноўлена: галоўны інжынер сельгасарганізацыі атрымаў грошы за спрыяльнае вырашэнне пытання па ацэнцы і спісанню пагрузчыка, які знаходзіцца на балансе прадпрыемства, і наступнай яго рэалізацыі хабарадавальніку”, — гаворыцца ў паведамленні.
Узбуджана крымінальная справа.
“МУС працягвае мэтанакіраваную працу па выяўленні фактаў карупцыі, асабліва ў сферы АПК”, — заявілі ў міністэрстве.
“Асобныя станоўчыя тэндэнцыі” ў дынаміцы выяўлення карупцыйных злачынстваў у гэтым годзе “аб’ектыўна страчаны”, заявіў 26 верасня кіраўнік Міністэрства ўнутраных спраў Іван Кубракоў на пасяджэнні калегіі МУС.
Паводле паведамлення прэс-службы ведамства, ён раскрытыкаваў шэраг тэрытарыяльных падраздзяленняў па барацьбе з эканамічнай злачыннасцю (БЭЗ).
Кубракоў таксама адзначыў, што МУС перайшло ад “бытавых” хабараў да выяўлення і спынення схем сістэмнай “дзелавой” карупцыі. Актыўней выкарыстоўваецца інструментарый аператыўна-вышуковай прафілактыкі, сказаў ён.
Намеснік міністра ўнутраных спраў — начальнік крымінальнай міліцыі Генадзь Казакевіч паведаміў, што з пачатку 2025 года спынена 22 схемы, звязаныя з сістэмнай “дзелавой” карупцыяй, у якіх удзельнічалі 114 фігурантаў, з іх 92 — хабарнікі. У сем такіх схем былі ўцягнутыя службовыя асобы сельгаспрадпрыемстваў.
“Акцэнт у працы ОУС ссунуты на выяўленне буйных хабараў. Калі ў 2022 годзе іх агульная сума складала крыху больш за два мільёны рублёў, то ў мінулым — каля шасці. За восем месяцаў бягучага года ўжо каля пяці мільёнаў рублёў”, — сказаў Казакевіч.
Згодна з данымі Вярхоўнага суда, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.
