Работнікі МНС атрымаюць права надглядаць грамадзян і прымяняць спецсродкі
7 кастрычніка, Позірк. Савет Рэспублікі Нацыянальнага сходу (СР НС) 7 кастрычніка ўхваліў законапраект “Аб змяненні законаў па пытаннях дзейнасці органаў і падраздзяленняў па надзвычайных сітуацыях”.
Перад гэтым старшыня камісіі СР НС па міжнародных справах і нацыянальнай бяспецы Сяргей Алейнік прадставіў заключэнне сваёй парламенцкай групы адносна гэтага дакумента. У прыватнасці, ён паведаміў, што праект закона скіраваны “на ўдасканаленне прававога рэгулявання грамадскіх адносін у сферы дзейнасці” МНС і карэктуе законы “Аб пажарнай бяспецы”, “Аб органах і падраздзяленнях па надзвычайных сітуацыях Рэспублікі Беларусь”, “Аб фізічнай культуры і спорце” і “Аб ліцэнзаванні”.
Дакумент прадугледжвае, што ў работнікаў органаў і падраздзяленняў па надзвычайных сітуацыях будзе права праводзіць асабісты дагляд грамадзян і прымяняць спецыяльныя сродкі “ў выпадках і парадку, прадугледжаных праектам закона”.
У законапраекце таксама:
- удакладняюцца пытанні фінансавання органаў і падраздзяленняў па НС;
- замацоўваюцца паўнамоцтвы па дзяржаўным пажарным наглядзе на аб’ектах па вытворчасці, захоўванні і ўтылізацыі выбуховых матэрыялаў і вырабаў, якія іх ўтрымліваюць; па тушэнні пажараў на такіх аб’ектах;
- удакладняюцца паўнамоцтвы прэзідэнта і Савета міністраў у сферы гарантавання пажарнай бяспекі;
- палажэнні закона “Аб пажарнай бяспецы” прыводзяцца ў адпаведнасць з патрабаваннямі тэхнічных рэгламентаў Мытнага саюза і Еўразійскага эканамічнага саюза ў галіне пажарнай бяспекі.
Палата прадстаўнікоў Нацыянальнага сходу (ПП НС) прыняла гэты законапраект у першым чытанні 16 верасня. Тады член камісіі ПП НС па нацбяспецы Анатоль Булаўка заявіў дэпутатам, што галоўная мэта дакумента — падвысіць бяспеку грамадзян і “ўзмацніць эфектыўнасць дзейнасці” органаў па НС.
Пасля ўхвалення Саветам Рэспублікі дакумент павінен падпісаць Аляксандр Лукашэнка.
У 2022 годзе ўлады прынялі законапраект “Аб змене Закона Рэспублікі Беларусь “Аб унутраных войсках Міністэрства ўнутраных спраў Рэспублікі Беларусь”, згодна з якім унутраныя войскі атрымалі “большую самастойнасць”.
