39-гадовы пасажыр загінуў у ДТЗ з ласём у Калінкавіцкім раёне

7 кастрычніка, Позірк. Пра смяротнае дарожна-транспартнае здарэнне з ласём у Калінкавіцкім раёне паведамляе УУС Гомельскага аблвыканкама.

ДТЗ здарылася 7 кастрычніка каля 19:30. Адзначаецца, што 28-гадовы кіроўца аўтамабіля “Хёндай” па дарозе з Мазыра ў Калінкавічы “здзейсніў наезд на дзікую жывёліну (лася), якая раптоўна выбегла на праезную частку перад блізка ідучым транспартам”.

“39-гадовы пасажыр загінуў на месцы здарэння, а кіроўца аўтамабіля з траўмамі шпіталізаваны ў бальніцу”, — гаворыцца ў паведамленні.

Заяўляецца, што “жывёла загінула на месцы ДТЗ”.

Раней паведамлялася, што ў Беларусі за сем месяцаў 2025 года зарэгістравана 2.995 ДТЗ з удзелам дзікіх жывёл, у выніку якіх загінула (траўмавана) 3.046 жывёл.

Адкрытай інфармацыі пра колькасць выпадкаў гібелі людзей пры сутыкненні з жывёламі на дарогах Беларусі няма, аднак гэта адбываецца рэгулярна.