26 кастрычніка BelPol апублікуе расследаванне аб падраздзяленні КДБ “Альфа”, якое пераследуе апанентаў рэжыму — прадстаўнік аб’яднання

Апублікавана на адкрытай версіі “Позірку” 24 кастрычніка 2025 года ў 19:19

24 кастрычніка, Позірк. 26 кастрычніка BelPol апублікуе расследаванне аб падраздзяленні Камітэта дзяржаўнай бяспекі Беларусі “Альфа”, якое павінна займацца антытэрарыстычнай дзейнасцю, але насамрэч з’яўляецца “канкрэтным рычагом ціску на палітычных апанентаў рэжыму Лукашэнкі”. Пра гэта паведаміў журналістам прадстаўнік аб’яднання Мацвей Купрэйчык на прэзентацыі даклада “Дзеці без будучыні: мілітарызацыя дзяцінства ў Беларусі” 23 кастрычніка ў Варшаве. Дакумент быў падрыхтаваны сумесна з Народным антыкрызісным упраўленнем (НАУ).

Як заявіў кіраўнік НАУ Павел Латушка, у прыватнасці, узмацняюцца пагрозы на адрас яго супрацоўнікаў. “Якраз сёння паліцыя Варшавы запрасіла нашых калег па НАУ, якія даюць паказанні ў якасці сведкаў у сувязі з пагрозамі на іх адрас, з нагоды таго, што МУС Расійскай Федэрацыі размясціла іх ў спісе асобаў, якія знаходзяцца ў вышуку на тэрыторыі РФ. Вельмі важна, што польскі бок на гэта рэагуе, гэта іх ініцыятыўная рэакцыя, яны збіраюць гэтыя доказы і сведчанні”, — паведаміў палітык.

“Калі мяне пытаюцца прадстаўнікі МУС, што яны могуць зрабіць, я заўсёды кажу: для нас важна, каб вы падтрымлівалі нашую бяспеку, бо мы вядзем барацьбу з жудасным рэжымам, які выкарыстоўвае нелімітаваныя магчымасці, сродкі супрацьдзеяння нам”, — дадаў кіраўнік НАУ.

Гл. таксама па тэме:

Латушка паведаміў пра пагрозы забойствам, якія паступілі яму і Ціханоўскай, асоба чалавека, які пагражаў, устаноўлена з дапамогай BelPol (калі спасылка не працуе, карыстайцеся, калі ласка, гэтай)