Дэмсілы заклікалі Савет Еўропы падтрымліваць беларусаў за мяжой і змагацца з транснацыянальнымі рэпрэсіямі рэжыму Лукашэнкі
Генеральны сакратар Савета Еўропы Ален Берсэ (за трыбунай) і прадстаўнік дэлегацыі дэмсіл Беларусі Ірына Халопіца (на экране)
28 кастрычніка, Позірк. Рэпрэсіі ў Беларусі працягваюцца, паведаміла генеральнаму сакратару Савета Еўропы Алену Берсе пасля яго выступу на сесіі Кангрэса мясцовых і рэгіянальных уладаў 28 кастрычніка ў Страсбургу прадстаўнік дэлегацыі беларускіх дэмакратычных сіл, член Каардынацыйнай рады (КР) Ірына Халопіца.
Паводле наяўных звестак, адзначыла яна, ад 600 тыс. да 1 млн беларусаў былі вымушаныя пакінуць краіну, “аднак пераследы працягваюцца і за мяжой”.
“Рэжым [Аляксандра] Лукашэнка выкарыстоўвае сфабрыкаваныя крымінальныя абвінавачванні і завочныя суды, канфіскацыю маёмасці, пагрозы членам сям’і і кампаніі па дыскрэдытацыі — практыкі, якія прадстаўляюць сабой транснацыянальныя рэпрэсіі, — канстатавала Халопіца. — Беларусы ў выгнанні пазбаўленыя права атрымліваць або падаўжаць дакументы Лукашэнка, які забараняе беларускім консульствам за мяжой абменьваць ці падаўжаць пашпарты грамадзян. Гэта фактычна змушае людзей вяртацца ў Беларусь, дзе ім пагражае сур’ёзная рызыка пераследу”.
Паводле слоў прадстаўніка дэлегацыі беларускіх дэмсіл, у гэтай сітуацыі дзясяткі тысяч чалавек “сутыкаюцца з праблемамі легалізацыі і жывуць у страху перад дэпартацыяй”.
Падзякаваўшы Савету Еўропы “за прыняцце Люксембургскіх рашэнняў”, Халопіца ад імя дэлегацыі папрасіла “працягваць гэтую працу і ўзмацніць падтрымку беларусаў, якія апынуліся ў беспрэцэдэнтна цяжкай сітуацыі ў параўнанні з іншымі мігрантамі, што атрымліваюць дапамогу ад сваіх дзяржаў праз консульскія і дыпламатычныя ўстановы”.
“Таксама мы хацелі б звярнуцца да Савета Еўропы з просьбай працягваць і актывізаваць намаганні па супрацьдзеянні транснацыянальным рэпрэсіям рэжыму Лукашэнкі ў дачыненні да беларусаў, якія жывуць тут, у Еўропе”, — падсумавала яна.
Праз шчыльны парадак дня пасяджэння Кангрэса Берсэ не паспеў адрэагаваць на выступленне Халопіцы.
Цяперашняя сесія Кангрэса мясцовых і рэгіянальных уладаў праходзіць 28–30 кастрычніка. На ёй абмяркоўваюцца пытанні свабоды сходаў і свабоды выказвання меркаванняў, удзел моладзі ў жыцці мясцовых уладаў, жыллёвы крызіс у гарадах і рэгіёнах Еўропы, барацьба з наркотыкамі на ўзроўні мясцовых супольнасцяў, узмацненне рэгіянальнай палітыкі, мір для Украіны ды інш.
Адно з дадатковых мерапрыемстваў, якое пройдзе ў рамках сесіі Кангрэса 29 кастрычніка, прысвечанае дапамозе мясцовых уладаў беларусам, якія сутыкнуліся з транснацыянальнымі рэпрэсіямі.
Кангрэс мясцовых і рэгіянальных уладаў — асамблея ў складзе Савета Еўропы, з’яўляецца яе трэцяй асноўнай інстытуцыяй (апрача Камітэта міністраў і ПАСЕ), куды ўваходзяць губернатары, мэры, лідары мясцовых уладаў з 46 краін СЕ.
Даступна падпісчыкам “Позірк+”:
Прадстаўнікі дэмсіл Беларусі працягнуць вывучаць практыкі самакіравання пад эгідай Кангрэса мясцовых і рэгіянальных уладаў
28 кастрычніка, Позірк. Прадстаўнікі дэмакратычных сіл Беларусі працягваюць вывучаць лакальныя практыкі самакіравання пад эгідай Кангрэса мясцовых і рэгіянальных уладаў, вынікае з заявы генеральнага сакратара гэтай арганізацыі Мацьё Мары на брыфінгу 28 кастрычніка ў Страсбургу. Спікер адзначыў, што адно з дадатковых …
