На другім энергаблоку БелАЭС пачынаецца планава-папераджальны рамонт

12 лістапада, Позірк. Другі энергаблок Беларускай атамнай электрастанцыі 13 лістапада будзе “выведзены ў планава-папераджальны рамонт”, паведамляе прэс-служба Міністэрства энергетыкі.

Такі рамонт, адзначае ведамства, штогод праводзіцца на атамных станцыях у адпаведнасці з устаноўленым рэгламентам для “забеспячэння стабільнага працоўнага стану абсталявання”.

Запланавана правядзенне планавага тэхнічнага абслугоўвання, дыягностыкі і рамонту абсталявання і тэхналагічных сістэм.

Акрамя таго, спецыялісты пракантралююць стан асноўнага металу і зварных злучэнняў абсталявання і трубаправодаў.

“Важнай часткай работ стане замена адпрацаванага ядзернага паліва на свежае — у актыўную зону рэактара будзе загружана каля 25% цеплавыдзяляльных зборак са свежым ядзерным палівам“, — гаворыцца ў паведамленні.

Планава-папераджальны рамонт будзе выкананы персаналам БелАЭС з прыцягненнем работнікаў беларускіх і расійскіх арганізацый.

Другі энергаблок станцыі быў уведзены ў прамысловую эксплуатацыю 1 лістапада 2023 года. За мінулы перыяд ён выпрацаваў 18,5 млрд кВтч электраэнергіі.

Збудаванне першай станцыі — Беларускай АЭС паблізу Астраўца (Гродзенская вобласць) — завяршылася восенню 2023 года. Станцыя пабудаваная паводле расійскага праекта, пераважна за кошт крэдыту РФ, генеральным падрадчыкам выступіў “Расатам”. Першы блок сілкуе энергасістэму з 3 лістапада 2020 года, другі — з 13 траўня 2023-га, у прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.

Улады маюць намер павялічыць ядзерна-энергетычны патэнцыял краіны, пабудаваўшы новую АЭС або збудаваўшы большую колькасць энергаблокаў на дзейнай.

Беларускія ўлады і прапаганда з моманту ўзнікнення ідэі будаўніцтва атамнай электрастанцыі і ў наступныя гады запэўнівалі, што ўзвядзенне АЭС выгадна для жыхароў. Аднак сярэдняя цана на электраэнергію (у разліку за 100 кВт·г) у Беларусі ў першым квартале 2025 года склала 27,34 рубля — на 8,9% больш, чым за аналагічны перыяд 2024-га (25,11), сведчыць праведзены “Позіркам“ аналіз звестак Нацыянальнага статыстычнага камітэта.