Беларусы чэрпаюць сілы з прыкладу Латвіі і яе падтрымкі ў барацьбе за вызваленне краіны — Ціханоўская
18 лістапада, Позірк. Гісторыя Латвіі паказвае, “як нацыя можа падняцца, аднавіцца і вярнуць сабе свабоду”, заявіла беларускі дэмакратычны лідар Святлана Ціханоўская, віншуючы 18 лістапада “дарагіх сяброў” з Днём абвяшчэння Латвійскай Рэспублікі.
“Беларусы чэрпаюць сілу з вашага прыкладу і вашай падтрымкі ў нашай барацьбе за вызваленне краіны”, — напісала палітык на сваёй старонцы ў сацыяльнай сетцы Х.
Раней Аляксандр Лукашэнка, віншуючы латвійскі народ з гэтым святам, выказаў упэўненасць у тым, што атрымаецца “пераадолець любыя цяжкасці і захаваць стасункі добрасуседства, заснаваныя на ўзаемнай падтрымцы і павазе”, нягледзячы на ”няўдалыя спробы асобных палітыкаў сілком абмежаваць беларуска-латвійскія гума”.
Латвійскія ўлады паслядоўна падтрымліваюць беларускія дэмакратычныя сілы. У той жа час Латвія, будучы часткай Еўрапейскага саюза, не прызнае Лукашэнку легітымным прэзідэнтам Беларусі. Еўрасаюз увёў у дачыненні да прадстаўнікоў яго рэжыму санкцыі.
У сваю чаргу ўрад Беларусі вясной 2022 года зацвердзіў пералік “замежных дзяржаў, якія здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб”, у які ўваходзяць усе краіны ЕС.
Латвія — адна з трох краін ЕС, якія з вясны 2021 года штодня сутыкаюцца з праявамі міграцыйнага крызісу на мяжы з Беларуссю, які, на іх думку, арганізаваны Мінскам і Масквой (сёлета ў лістападзе латвійскі кірунак стаў асноўным аб’ектам увагі мігрантаў, якія імкнуцца нелегальна трапіць у ЕС з беларускай тэрыторыі).
25 ліпеня ў інтэрв’ю журналісту амерыканскага выдання Time (апублікавана 8 жніўня) Сайману Шустэру Лукашэнка фактычна выступіў з прамой пагрозай на адрас Латвіі ў выпадку гіпатэтычнага ваеннага канфлікту з Захадам.
“Мы кожны дзень, кожны месяц рыхтуемся да вайны, каб пазбегнуць яе. Некаторыя кажуць, маўляў, ну чаго там, 80–100 тысяч [у Беларусі] армія — якая гэта армія. Ведаеце, хто б мог падумаць, што Украіна пратрымаецца столькі супраць другой арміі свету. Таму не трэба, мы ведаем, што рабіць. Мы вывучылі ўрокі ўсіх апошніх войн, і супраць нас была вайна, мы адпаведныя ўрокі вывучылі. Мы наўрад ці пераможам натаўцаў, яшчэ некага, нават 300 тысяч у палякаў будзе войскаў. Наша канцэпцыя заснаваная на тым, што мы гатовыя нанесці непрымальную шкоду Польшчы, Літве, Латвіі там, Эстоніі, хто супраць нас будзе ваяваць”, — заявіў ён.
