Генпракуратура справаздачылася аб выяўленні звыш 700 фактаў “незаконнага размяшчэння адкідаў”
19 лістапада, Позірк. Больш за 750 актаў нагляду вынесена па выніках праверкі заканадаўства ў сферы добраўпарадкавання населеных пунктаў і навядзення парадку на зямлі, паведамляе Генеральная пракуратура.
Адзначаецца, што ва ўсіх абласцях і Мінску пракуроры выявілі “больш за 700 фактаў незаконнага размяшчэння адкідаў”, пры гэтым “у рэгіёнах сістэматычна не выконвалі графікі іх вывазу”.
Акрамя таго, зафіксаваныя парушэнні патрабаванняў, што прад’яўляюцца да кантэйнерных пляцовак для збору адкідаў, і іх “неналежны санітарны стан”.
У прыватнасці, у Гродзенскай вобласці з 863 правераных пляцовак і кантэйнераў 277 (32%) “не адпавядалі гэтым патрабаванням (пашкоджаныя кантэйнеры, адсутнічала агароджа, цвёрдае воданепранікальнае пакрыццё і інш.)”.
Падчас праверкі выяўлена “звыш адной тысячы разбурэнняў і дэфектаў будынкаў, збудаванняў, дзіцячых спартыўных і гульнявых пляцовак, тратуараў, пешаходных і веласіпедных дарожак, аўтамабільных парковак і стаянак, альтанак, кветнікаў, фантанаў, лавак і элементаў асвятлення”, гаворыцца ў паведамленні.
Ні адзін з пяці фантанаў Мазыра (Гомельская вобласць) у цёплы час года “не функцыянаваў на пастаяннай аснове”, удакладняецца ў рэлізе. “Абсталяванне было няспраўнае, чашы не ачышчаныя ад бруду і глейкіх адкладаняў, агулам канструкцыі мелі шматлікія пашкоджанні”, — паведамляе Генпракуратура.
Таксама выяўлена “больш за 200 участкаў аўтамабільных дарог, у тым ліку вулічна-дарожнай сеткі з крытычнай ямачнасцю і выбоінамі, якія патрабавалі неадкладных аднаўленчых работ, але не былі запланаваныя да рамонту ў бягучым годзе”.
Устаноўленыя выпадкі “неналежнага ўтрымання прыпыначных пунктаў, пасажырскіх платформаў і месцаў адпачынку, якія размешчаныя ўздоўж аўтамабільных і чыгунак”.
Шэраг парушэнняў, як адзначае ведамства, звязаны з “утрыманнем месцаў пахаванняў і незаконным атрыманнем бюджэтных сродкаў для іх добраўпарадкавання”.
Устаноўлена “больш за 150 выпадкаў загрувашчвання вуліц, плошчаў, двароў, а таксама іншых зямель агульнага карыстання будаўнічымі матэрыяламі і іншымі прадметамі, пакінутымі без увагі арганізацыямі ЖКГ і выканкамамі”.
9 студзеня Аляксандр Лукашэнка падпісаў указ № 1, якім 2025 год абвясціў “Годам добраўпарадкавання”.
Сярод іншага тады былі анансаваныя “маштабныя меры, у тым ліку па навядзенні парадку на зямлі, добраўпарадкаванні населеных пунктаў, вытворчых аб’ектаў, падтрыманні ў належным стане тэрыторый уздоўж аўтамабільных і чыгунак”.
Гл. таксама:
