Спартыўны арбітражны суд адмяніў забарону ўдзельнічаць у адборы на Алімпіяду беларускім фрыстайлістам, лыжнікам і снаўбардыстам
2 снежня, Позірк. Спартыўны арбітражны суд (CAS) задаволіў апеляцыю Беларускага лыжнага саюза на рашэнне Міжнароднай федэрацыі лыжнага спорту і снаўборда (FIS) аб забароне ўдзельнічаць у алімпійскай кваліфікацыі спартсменам з Беларусі. Пра гэта паведамляе Нацыянальны алімпійскі камітэт (НАK).
Апеляцыя была пададзена 11 лістапада 2025 года, CAS разгледзеў яе 26 лістапада. Рашэнне вынесена 2 снежня, адзначае НАК.
Падкрэсліваецца, што арбітражны суд адмяніў рашэнне FIS, паколькі “яно забараняе выступаць на спаборніцтвах і кваліфікацыйных спаборніцтвах, прызнаных Міжнароднай федэрацыяй лыжнага спорту і снаўборда, беларускім спартсменам, якія задавальняюць крытэрыям, устаноўленым Міжнародным алімпійскім камітэтам для ўдзелу ў якасці індывідуальных нейтральных спартсменаў (AIN) на зімовых Алімпійскіх гульнях 2026 года”.
“Такім чынам, беларускія спартсмены-лыжнікі, якія адпавядаюць крытэрам МАК як AIN-спартсмены, павінны быць дапушчаныя да ўдзелу ў кваліфікацыйных мерапрыемствах і адборы на Алімпійскія гульні 2026 года”, — заяўляе НАК.
21 кастрычніка FIS не дапусціў беларускіх і расійскіх спартсменаў да кваліфікацыйных алімпійскіх спаборніцтваў пад сваёй эгідай.
“Савет FIS прагаласаваў за нядопуск спартсменаў у індывідуальным нейтральным статусе да кваліфікацыйных спаборніцтваў да зімовых Алімпійскіх і Паралімпійскіх гульняў 2026 года ў Мілане”, — гаварылася ў прэс-рэлізе.
Пад эгідай FIS праводзяцца спаборніцтвы па лыжных гонках, горных лыжах, фрыстайле і снаўбордзе.
Пры гэтым беларускія фрыстайлісты з 1998 года заваёўвалі медалі на ўсіх Алімпіядах.
19 верасня Міжнародны алімпійскі камітэт (МАК) паведаміў, што індывідуальныя нейтральныя спартсмены (ІНС), якія прайшлі кваліфікацыю ў сваіх відах спорту, будуць спаборнічаць на зімовых Алімпійскіх гульнях у італьянскіх гарадах Мілан і Карціна-д’Ампецца ў 2026 годзе на тых жа ўмовах, што і на летняй Алімпіядзе ў Парыжы ў 2024 годзе.
Зімовыя Алімпійскія гульні пройдуць з 6 па 22 лютага 2026 года.
28 жніўня стала вядома, што ў іх не змогуць прыняць удзел біятланісты з Беларусі і Расіі.
20 снежня 2024 года Міжнародны саюз канькабежцаў дазволіў нейтральным атлетам з Беларусі ўдзельнічаць у адборы на Алімпіяду, прыняўшы шэраг абмежаванняў.
28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэта рэкамендацыя была неадкладна і масава прынята да выканання, у выніку чаго расійскі і беларускі спорт апынуўся практычна ў поўнай ізаляцыі.
25 студзеня 2023 года выканаўчы камітэт МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ні аднаму спартсмену нельга забараняць удзел у спаборніцтвах “толькі праз яго пашпарт”.
28 сакавіка таго ж года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.
