На рэалізацыю пяцігадовай дзяржпраграмы па нетрах плануецца выдаткаваць 276 млн рублёў
20 снежня, Позірк. Дзяржпраграму “Нетры” на 2026–2030 гады, нацэленую на “развіццё мінеральна-сыравіннай базы як асновы эканамічнай бяспекі дзяржавы”, зацвердзіў Савет міністраў, паведаміла 20 снежня прэс-служба ўрада.
Адзначаецца, што праграма заклікана падвысіць узровень “геалагічнай вывучанасці тэрыторыі”, а таксама забяспечыць “ўзнаўленне і развіццё мінеральна-сыравіннай базы, падвышэнне эфектыўнасці выкарыстання карысных выкапняў”.
Згодна з дзяржпраграмай, да 2030 года “геалагічнымі мапамі новага пакалення маштабу 1:200000” мае быць ахоплена 60% тэрыторыі Беларусі (у 2025 годзе — 42%).
Аб’ём фінансавання на пяцігадовы перыяд — 276 млн рублёў. З іх сродкі рэспубліканскага бюджэту — 273,3 млн рублёў (99%), уласныя сродкі арганізацый — 2,7 млн (1%).
На нарадзе пра стан і развіццё мінеральна-сыравіннай базы 12 сакавіка Аляксандр Лукашэнка заявіў, што ў Беларусі кепска шукаюць карысныя выкапні.
“Усе карысныя выкапні — наш нацыянальны здабытак, — адзначыў ён. — Стратэгічны запас, які належыць народу. І толькі народу. Гэта і калій, і нафта, і самы вялікі рэсурс — пітная вада (бясцэнны рэсурс), ды многае іншае. Але з тым, што мы маем, трэба пісьменна і па-гаспадарску распараджацца. А тое, што не маем, трэба шукаць. Шукаем кепска”.
20 красавіка ў Талачыне (Віцебская вобласць) Лукашэнка прызнаў, што ўБеларусі няма вуглевадародаў у той колькасці, каб прадаваць за мяжу. “Гасподзь нам нафты-газу ў гэтую зямельку не ўклаў, каб мы маглі пампануць, па трубе некаму прадаць, а грошы падзяліць. Мы гэтага не маем, мы ўсе сваімі рукамі зарабляем”, — заявіў палітык.
22 красавіка, прызначаючы Сяргея Масляка міністрам прыродных рэсурсаў і аховы навакольнага асяроддзя, Лукашэнка заявіў: “Я не веру, што ў нас няма вялікіх аб’ёмаў нафты”.
“Скажу наўпрост: трэба капаць і шукаць, — сказаў ён. — Акрамя гэтага, трэба, каб ты прымусіў усіх у гэтым напрамку працаваць. Я не веру, што ў нашых нетрах няма таго, што нам трэба. Вось калі хоць у нейкай ступені вырашыш гэтую задачу, гэта помнік можна ставіць у любым месцы”.
Пра неабходнасць далейшых пошукаў у Беларусі радовішчаў нафты Лукашэнка таксама заяўляў 22 ліпеня на нарадзе па пытаннях здабычы вуглевадароднай сыравіны.
Звярнуўшы ўвагу на падрыхтаваны ўрадам план правядзення геолагаразведачных работ, палітык адзначыў, што “тэрміны іх выканання, як звычайна, зацягнутыя — да 2030 года”.
“Мы вельмі сур’ёзна абмяркоўвалі праблему, — сказаў ён. — Гэта не толькі нафта і газ. Гэта і іншыя нашы запасы мінеральныя. Сёлета плануецца выйсці на 2 млн тон нафты”.
Паводле сцвярджэння Лукашэнкі, у Беларусі ў гэтай сферы “існуюць рэзервы”, таму “трэба не разгойдвацца, а свідраваць і свідраваць з розумам і з укараненнем новых тэхналогій”.
Тэрыторыя Беларусі добра вывучаная “геолагамі, нафтавікамі, спецыялістамі ў газавай галіне” — “сур’ёзных камерцыйных запасаў нафты і газу” не выяўлена, заяўляў у эфіры ютуб-канала “Папулярная палітыка” ў 2024 годзе расійскі нафтагазавы эксперт Міхаіл Круціхін, каментуючы неаслабнае жаданне Лукашэнкі знайсці ў айчынных нетрах вуглевадароды.
