Лукашэнка абвясціў 2026-ы Годам беларускай жанчыны

1 студзеня, Позірк. Годам беларускай жанчыны абвясціў 2026 год Аляксандр Лукашэнка ў навагоднім звароце.

“Мы ўшаноўваем нашых маці, жонак і дачок адзін дзень у годзе. Надышоў час аддаць належнае іх асаблівай ролі ў нашым жыцці“, — патлумачыў ён сваё рашэнне.

Лукашэнка заклікаў “берагчы нашу жанчыну і сваю зямлю, абараняць сваю будучыню — сям’ю, родных, блізкіх і сяброў ад бед і нягод”.

Паводле звестак праваабарончага цэнтра “Вясна”, у месцах пазбаўлення волі на канец снежня знаходзілася 167 жанчын-палітвязняў. 659 жанчын такі статус мелі раней (падлік вядзецца з траўня 2020 года, калі пачалася прэзідэнцкая выбарчая кампанія).

Даведка: 2025-ы быў аб’яўлены Годам добраўпарадкавання, 2024-ы — Годам якасці, 2023-ы — Годам міру і стварэння, 2022-м — Годам гістарычнай памяці, 2021-ы — Годам народнага адзінства, 2018-2020-ы — Годам малой радзімы.

Гл. таксама:

Нармалізацыя сексізму. Як прапаганда ператварае жанчын у дадатак да мужчын