Упершыню за апошнія 10 гадоў на Новы год не было адлігі

Апублікавана на адкрытай версіі “Позірку” 1 студзеня 2026 года ў 19:17

1 студзеня, Позірк. Упершыню за апошнія 10 гадоў на Новы год не было адлігі, сведчыць праведзены “Позіркам“ аналіз аператыўных і архіўных даных Белгідрамета.

Халадней за ўсё мінулай ноччу было ў раёне метэастанцыі “Палеская ” ў Лунінецкім раёне (Брэсцкая вобласць) — 22,4 градуса ніжэй за нуль, у Ганцавічах — 21,3 і Мінску — 20,8 пры прагнозе сіноптыкаў да -20.

Апошні раз марознае надвор’е было ў першыя суткі 2016 года, а самым цёплым у разгляданы перыяд аказалася 1 студзеня 2023 года, калі быў зафіксаваны абсалютны рэкорд дня і месяца за ўвесь перыяд інструментальных метэаназіранняў у Беларусі (з 1881 года) — 16,4 градуса вышэй за нуль у Высокім (Брэсцкая вобласць).

Абсалютны тэмпературны мінімум трымаецца 47 гадоў (-32,1 градуса 1 студзеня 1979 года ў Езярышчы на поўначы Віцебскай вобласці).

2 студзеня Белгідрамет прагназуе рэзкае пацяпленне: ноччу ад 0 на паўднёвым захадзе да -17 на ўсходзе, днём ад -3 да +1. На працягу сутак 3 студзеня ад 0 да -6.