Мінскі аэрапорт задзейнічаў дадатковыя сілы для ачысткі ўзлётна-пасадачнай паласы

9 студзеня, Позірк. Нацыянальны аэрапорт Мінск паведаміў 9 студзеня, што яго службы працуюць “ва ўзмоцненым рэжыме для забеспячэння бяспечных умоў выканання палётаў”.

Адзначаецца, што аэрапорт “працягвае функцыянаваць у штатным рэжыме ў складаных метэаўмовах”.

“Выведзеныя дадатковыя рэзервы тэхнікі, узмоцненыя брыгады рабочых, кіроўцаў”, — гаворыцца ў паведамленні.

“Для ачысткі і апрацоўкі антыгалалёднымі рэагентамі ўзлётна-пасадачнай паласы, рулёжных дарожак і перона, уборкі снегу на прывакзальнай плошчы задзейнічана каля 50 адзінак шматфункцыянальнай снегаўборачнай тэхнікі, спецмашын для размеркавання хімрэагентаў, камунальнай тэхнікі. Ва ўборцы снегу задзейнічана звыш 220 работнікаў аэрапорта”, — адзначае порт.

Звяртаецца ўвага, што снегаўборачная тэхніка на ўзлётна-пасадачнай паласе працуе “практычна без прыпынку”, “праводзіцца своечасовая ўборка снегу для забеспячэння высокага ўзроўню бяспекі палётаў”. Таксама праводзіцца “перадпалётная супрацьабледзяляльная апрацоўка паветраных судоў з мэтай выдалення замерзлых ападкаў і прадухілення іх з’яўлення на паверхнях самалёта да ўзлёту”.

Пасажырам і сустракаючым рэкамендуецца “планаваць сваю паездку ў аэрапорт загадзя, улічваючы ўмовы надвор’я і дарожную абстаноўку”.

Паводле даных табло аэрапорта, увечары 8 студзеня, ноччу, раніцай і днём 9 студзеня некаторыя рэйсы вылецелі з затрымкай. Напрыклад, самалёт у Дубай адправіўся на 9,5 гадзіны пазней, у 12:32 замест 3:05.