Другі блок БелАЭС уключаны ў сетку пасля 57 дзён рамонту
10 студзеня, Позірк. Планава-папераджальны рамонт другога энергаблока Беларускай атамнай электрастанцыі завершаны, паведаміла ранкам 10 студзеня прэс-служба Міністэрства энергетыкі.
Паводле інфармацыі ведамства, у рамках рамонту “выкананая планавая замена часткі адпрацаванага ядзернага паліва на свежае”. Блок уключаны ў сетку.
“У адпаведнасці з міжнароднай практыкай з мэтай падтрымання стабільнага працоўнага стану абсталявання планава-папераджальны рамонт праводзіцца на атамных станцыях штогод”, — гаворыцца ў паведамленні.
Згодна з інфармацыяй Мінэнерга, рамонт на другім блоку БелАЭС распачаўся 13 лістапада 2025 года. Такім чынам, работы вяліся 57 дзён.
Збудаванне БелАЭС ля Астраўца (Гродзенская вобласць) завяршылася ўвосені 2023 года. Станцыя пабудаваная паводле расійскага праекту, пераважна за кошт крэдыту РФ, генеральным падрадчыкам выступіў “Расатам”. Першы блок сілкуе энергасістэму з 3 лістапада 2020 года, другі — з 13 траўня 2023-га, у прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.
У сярэдзіне лістапада 2025 года стала вядома, што ўлады Беларусі маюць намер пабудаваць трэці энергаблок БелАЭС (уключыць у энергасістэму плануецца ў 2035–2038 гадах), але не адмаўляюцца ад ідэі збудаваць другую атамную станцыю — ва ўсходняй частцы краіны.
