Найміт з Беларусі праз Лукашэнку папрасіў Пуціна дапамагчы яму вызваліцца з украінскага палону

2 лютага, Позірк. Відэазварот ураджэнца пасёлка Красны Руслана Купрацэвіча (2001 г.н.), які ваяваў на баку Расіі, да Аляксандра Лукашэнкі апублікаваў украінскі праект “Хачу жыць”.

Малады чалавек сцвярджае, што падпісаў кантракт з Міністэрствам абароны РФ 24 ліпеня 2025 года ў Сургуце, знаходзячыся ў месцах пазбаўлення волі. У палон трапіў летась 4 верасня.

Купрацэвіч папрасіў Лукашэнку звярнуцца да прэзідэнта Расіі Уладзіміра Пуціна, каб той дапамог яму вярнуцца дадому да сям’і.

Паводле інфармацыі праекта “Хачу жыць”, на пачатак 2025 года ў складзе расійскай арміі ваявала мінімум 742 найміты — грамадзянін Беларусі.

Пра тое, што Купрацэвіч, ураджэнец Дзяржынска (Мінская вобласць) Уладзіслаў Карлоўскі 2001 года нараджэння і ўраджэнец Мінска Віктар Азямблоўскі 1977 года нараджэння трапілі ва ўкраінскі палон, стала вядома летась у верасні.

Адзначалася, што яны разам служылі ў 136-й асобнай мотастралковай брыгадзе Сухапутных войскаў РФ, якая дыслакуецца ў Дагестане. Сярод іншага паведамлялася, што Купрацэвіч асуджаны за крадзяжы.

24 лютага 2022 года РФ распачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.