Узброеныя сілы істотна нарасцілі баявы патэнцыял за кошт паставак з РФ — Мінабароны

9 лютага, Позірк. Узброеныя сілы “ў максімальнай ступені выкарыстоўваюць мадэрнізацыйны патэнцыял існуючых узораў узбраення”, заявіў намеснік міністра абароны па ўзбраенні Андрэй Федзін з інтэрв’ю праграме “Арсенал” на тэлеканале “Беларусь 1” 8 лютага.

У якасці станоўчага прыкладу прыведзена ўдасканаленне сродкаў рухомасці да рэактыўнай сістэмы залпавага агню “Ураган”, на якія ўстанаўліваюцца рухавікі вытворчасці Мінскага маторнага завода.

На працягу мінулага года асвоены рамонт 82-міліметровага мінамёта 2Б24, транспартна-зараджальных машын комплексаў “Тор”, “Паланэз” і “Іскандэр”, удакладніў намеснік міністра.

Пры закупках узбраенняў галоўным партнёрам ён назваў Расію: “За кошт паставак з РФ нам удалося істотна нарасціць баявы патэнцыял Узброеных сіл”.

“У прыватнасці, толькі ў мінулым годзе ажыццяўляліся пастаўкі самалётаў Су-30СМ, верталётаў Мі-35М, транспарцёраў БТ-82А, цэлай лінейкі сучасных радыёкомплексаў, якія вырабляюцца прадпрыемствамі Расіі”, — дадаў Федзін.

Гаворачы аб беларускіх распрацоўках, прадстаўнік ведамства адзначыў лінейку сродкаў радыёэлектроннай барацьбы, “у тым ліку тактычнага, так званага акопнага РЭБ для барацьбы з беспілотнымі лятальнымі апаратамі, а таксама ўсе распрацоўкі ў галіне вытворчасці БПЛА, як разведвальных, так і ўдарных”.

“Яны паступаюць ужо ва Узброеныя сілы. Акрамя таго, мы традыцыйна закупляем на прадпрыемствах абароннага сектара эканомікі сродкі РЭБ”, — дадаў Федзін.

У 2025 годзе ва Узброеныя сілы пастаўлена 5,2 тыс. адзінак новых узораў узбраення, ваеннай і спецыяльнай тэхнікі (УВСТ) і дапаможнага абсталявання, а таксама 75 тыс. адзінак боепрыпасаў. Такія звесткі былі прыведзены 6 лютага на калегіі Дзяржаўнага ваенна-прамысловага камітэта (ДВПК).

Сярод іншага на ўзбраенне арміі прыняты: комплекс падаўлення навігацыйных прымачоў спадарожнікавых навігацыйных сістэм “Навес-М”, комплекс радыёманіторынгу і радыёпрыгнечання УКХ сувязі Р-936 “Аэра”, комплекс сродкаў кіравання рэактыўнымі сістэмамі залпавага агню “Вулкан”, бронетранспарцёр МЗКЦ 6200 БМ 9А33 МБ са складу ЗРК “АСА-АКМ”, радыёлакацыйная сістэма кругавога агляду 9С150 МБ, некіравальны рэактыўны снарад 9М22Ж РСЗА “Град”.

Па выніках пяці гадоў арганізацыямі ДВПК уведзены ў выкарыстанне айчынныя камплектуючыя ўзамен імпартных на суму каля 310,8 млн долараў (у 2025-м — 62,1 млн).