У Касцюковічах пры рамонце драбнільнага млына загінуў электрагазазваршчык

11 лютага, Позірк. 33‑гадовы электрагазазваршчык загінуў пры рамонце драбільнага млына, які выйшаў з ладу ў Касцюковічах (Магілёўская вобласць), паведамляе прэс-служба Следчага камітэта.

Трагедыя адбылася ўвечары 10 лютага на цэментным заводзе ў цэху памолу сыравіны. Паводле звестак следства, абсталяванне было адключанае. Падчас выканання работ мужчына знаходзіўся на валах механізму і з дапамогай газавага разака спрабаваў дастаць металічны прадмет, які захрас. Калі дэталь вызвалілася, рабочага па інэрцыі зацягнула ўнутр агрэгата.

Нягледзячы на ​​аператыўныя дзеянні ратавальнікаў і медыкаў, выратаваць чалавека не атрымалася.

Праверку праводзіць Касцюковіцкі раённы аддзел СК.

Раней СК паведаміў, што 9 лютага пры рамонце тэхнікі загінуў 41-гадовы рабочы аднаго з сельгаспрадпрыемстваў Салігорскага раёна (Менская вобласць).

Агулам у Мінскай вобласці ў 2025 годзе зарэгістравана 359 няшчасных выпадкаў на вытворчасці (годам раней — 362). Каэфіцыент частаты траўматызму склаў 60,1 (62,9) на 100 тысяч застрахаваных работнікаў, смяротны — 5.

У прыватным сектары зафіксавана 163 пацярпелыя; у сельскай гаспадарцы — 71; сярод работнікаў камунальных службаў — 13.

На разглядзе абласнога ўпраўлення СК у 2025 годзе знаходзілася звыш 520 матэрыялаў праверак па вытворчаму траўматызму. Па выніках праверачных мерапрыемстваў узбуджана каля 30 крымінальных спраў.