Чартарны рэйс з Мінска, які ляцеў у аманскую Салалу, здзейсніў пасадку ў Маскаце, пасля чаго адправіўся назад у Беларусь

3 сакавіка, Позірк. Чартарны рэйс кампаніі “Белавія”, які вылецеў 2 сакавіка з Мінска ў Салалу (паўднёвае ўзбярэжжа Амана), вяртаецца ў Мінск, паведаміў нацыянальны авіяперавозчык.

Адзначаецца, што “у сувязі з уводам абмежаванняў на палёты ў паветранай прасторы рэйс здзейсніў пасадку на запасным аэрадроме ў Маскаце (сталіца Амана)”. Авіякампанія “атрымала апавяшчэнне аб уводзе абмежаванняў у паветранай прасторы, калі борт з пасажырамі ўжо падлятаў да Салалы”.

“Паводле ўзгодненага з авіякампаніяй рашэння турыстычнага аператара, заказчыка рэйса, з мэтай забеспячэння бяспекі грамадзян, борт з турыстамі вылецеў з Маската назад у Мінск”, — гаворыцца ў паведамленні.

“Турыстам, якія знаходзяцца ў Салале, прадстаўлена пражыванне і харчаванне. Вывазны рэйс запланаваны на 4 сакавіка”, — паведамілі ў “Белавія”.

Раніцай 3 сакавіка авіяперавозчык таксама паведаміў, што сёння “запланаваны рэйс Дубай — Мінск, на якім будуць перавезены пасажыры з авіябілетамі на рэйс Дубай — Мінск 28 лютага 2026 года”. Пры гэтым 4 і 5 сакавіка рэгулярныя рэйсы Мінск — Дубай (ААЭ) адменены. У гэтыя даты плануюцца вывазныя рэйсы: шырокафюзеляжныя самалёты А 330-200 будуць вылятаць з Мінска без пасажыраў і дастаўляць у Беларусь пасажыраў з Дубая.

Увечары 3 сакавіка “Белавія” паведаміла, што рэйс з Дубая ў Мінск вылецеў і “ідзе па бяспечным маршруце, абыходзячы патэнцыйна небяспечныя тэрыторыі. Праз аблёт борт зробіць пасадку ў Актаў (Казахстан) для дазапраўкі і пасля возьме курс на нацыянальны аэрапорт Мінск. Чакаецца, што рэйс выканае пасадку пасля 2 гадзін ночы паводле мінскага часу 4 сакавіка.

Новай інфармацыі пра ўжо двойчы перанесены (з 1 на 2, а затым на 3 сакавіка) вывазны рэйс “Белавія” у Доху (сталіцу Катара) перавозчык пакуль не дае.

Раніцай 28 лютага Ізраіль і Злучаныя Штаты Амерыкі распачалі ваенныя дзеянні ў Іране, раздаліся выбухі ў Тэгеране, Ісфахане і Куме. Спачатку ўлады ў Тэль-Авіве заявілі пра “прэвентыўны” удар, а пазней абвясцілі пра пачатак аперацыі “Ільвіны рык”. Прэмʼер-міністр Ізраіля Бэньямін Нетаньяху заявіў, што яго краіна нанясе “цяжкі ўдар па тэрарыстычным рэжыме” і створыць умовы, “якія дазволяць іранскаму народу скінуць з сябе гэты цяжар”.

Міністэрства вайны ЗША абвесціла аб пачатку аперацыі “Эпічная лютасць”. Амерыканскі прэзідэнт Дональд Трамп выступіў са зваротам, у якім назваў яе мэты — знішчэнне ракет, разгром флоту, перадухіленне стварэння ядзернай зброі і свабода для іранскага народу.

У сваю чаргу Іран спачатку запусціў ракеты па Ізраілі, а потым — па амерыканскіх базах у краінах Блізкага Усходу.

Паводле даных Нацыянальнага агенцтва па турызме, цяпер у краінах Блізкага Усходу знаходзіцца больш як 3 тыс. турыстаў з Беларусі. У Арабскіх Эміратах адпачывае больш за 2,5 тыс. чалавек, у Амане — 319, у Катары — каля 200 чалавек, паведаміў дзяржаўны анлайн-партал news.by са спасылкай на Нацыянальнае агенцтва па турызме. У статыстыку ўключаны турысты, якія куплялі пуцёўкі праз турагенцтвы.