Урад дазволіў выкарыстоўваць больш як 1,3 тыс. га пацярпелых ад аварыі на ЧАЭС земляў, каля траціны — з абмежаваннямі

8 красавіка, Позірк. У Гомельскай вобласці больш як 1,3 тыс. гектараў зямель, якія пацярпелі ад аварыі на Чарнобыльскай АЭС, вернута ў поўнае або частковае выкарыстанне, вынікае з пастановы Савета міністраў № 170 ад 7 красавіка.

Згодна з дакументам, апублікаваным на Нацыянальным прававым інтэрнэт-партале 8 красавіка, большую частку — 940,1079 га — улады выключылі з радыяцыйна небяспечных зямель адчужэння і перавялі ў гаспадарчае карыстанне, вызначыўшы землекарыстальнікаў (у асноўным сельскагаспадарчыя арганізацыі).

У Веткаўскім раёне гэта прадпрыемствы “Стаўбунскі” (305,302 га), “Нямкі” (111,772 га), фермерская гаспадарка “Тачыліна” (26,9925 га), кіроўная кампанія холдынгу “Гомельагракамплект” (13,1773 га), арганізацыі “Веткаўскі аграсэрвіс” (7,7381 га), “Хальч” (7,4544 га), “Гомельэнерга” (7,312 га); Брагінскім — “Імя Жукава” (118,9832 га); Калінкавіцкім — “Козенкі-Агра” (83,3845 га); Мазырскім — “Саўгас-камбінат “Зара” (73,029 га); Кармянскім — “Белпрадукт” (70,3074 га); Рэчыцкім — “Агракамбінат “Холмеч” (31,0879 га), “Фрунзэ-Агра” (11,7977 га); Чачэрскім — “Палессе” (27,5827 га); Жлобінскім — “Жлобінскі Агратэхсэрвіс” (18,1289 га); Лельчыцкім — “Прыбаловічы” (12,3138 га), “Новая Ніва” (3,9707 га); Лоеўскім — “Бывалькі” (9,7738 га).

Яшчэ 378,716 га зямельных участкаў пераведзена з радыяцыйна небяспечных зямель адчужэння ў статус радыяцыйна небяспечных зямель абмежаванага гаспадарчага выкарыстання. У Брагінскім раёне яны замацаваныя за прадпрыемствамі “Камарынскі” (253,6081 га), “Чамерыскі” (94,459 га) і “Імя Жукава” (29,6508 га); у Веткаўскім — “Хальч” (0,9981 га).

Урад пастанавіў кантраляваць выкарыстанне гэтых зямельных участкаў “у адпаведнасці з экспертнымі заключэннямі Міністэрства сельскай гаспадаркі і харчавання пра магчымасць і ўмовы іх далейшага выкарыстання пры вядзенні сельскай гаспадаркі”; кантраляваць “радыеактыўнае забруджванне прадукцыі, што вырабляецца” на гэтых землях.