На мерапрыемстве АБСЕ Беларусь заявіла пра поспехі ў барацьбе з гандлем людзьмі, супрацьпаставіўшы сябе ЕС

22 красавіка, Позірк. Пра поспехі беларускай палітыкі ў галіне супрацьдзеяння трафікінгу заявіла дэлегацыя Міністэрства ўнутраных спраў на “26-й канферэнцыі АБСЕ па барацьбе з гандлем людзьмі”, вынікае з паведамлення тэлеграм-канала ведамасных выданняў — газеты “На страже” і часопіса “Міліцыя Беларусі”.

Хутчэй за ўсё, гаворка ідзе пра 26-ю канферэнцыю Альянсу па гандлі людзьмі, арганізаваную Бюро Спецыяльнага прадстаўніка і каардынатара АБСЕ па барацьбе з гандлем людзьмі, якая прайшла 20–21 красавіка ў Вене (Аўстрыя).

Міністэрскі рэсурс паведаміў, што “мерапрыемства было прысвечанае адной з хуткарослых і найменш вывучаных форм эксплуатацыі — прымушэнню ахвяр да злачыннай дзейнасці”, калі “ў зоне рызыкі апынаюцца дзеці, мігранты і асобы ва ўразлівым становішчы”.

Намеснік начальніка 2-га ўпраўлення галоўнага ўпраўлення па наркакантролі і супрацьдзеянні гандлю людзьмі крымінальнай міліцыі МУС Ігар Старых заявіў на канферэнцыі, што “ў беларускай мадэлі дзяржаўнай палітыкі супрацьдзеянне трафікінгу заканадаўча замацаванае за прэзідэнтам і ўрадам”.

“Гэта забяспечвае аператыўнасць прыняцця патрэбных мер і стабільнае фінансаванне, — сказаў ён. — У адрозненне ад шэрагу краін Еўрасаюза, дзе рашэнні прымаюцца ў залежнасці ад палітычнай кан’юнктуры. У цэлым мы адданыя прынцыпу дэпалітызацыі барацьбы з гандлем людзьмі і развіццю практычнай міждзяржаўнай супрацы ў гэтай сферы”.

“Акцэнт зроблены на прафілактыцы негатыўнай з’явы, дапамозе ахвярам і няўхільнасці пакарання для трафікёраў. У адрозненне ад некаторых дзяржаў ЕС (Аўстрыі, Францыі) робім ухіл на актыўнае выяўленне латэнтных злачынстваў, што дае магчымасць рэальна зніжаць узровень злачыннасці”, — дадаў Старых.

Заяўлена, што на канферэнцыі “абмеркаваныя дзейсныя інструменты абароны ахвяр трафікінгу, пашырэнне іх доступу да правасуддзя, эфектыўныя метады выяўлення і спынення фактаў злачыннай эксплуатацыі, прафілактычная праца”.

У 25-м профільным дакладзе Дзяржаўнага дэпартамента Злучаных Штатаў Амерыкі, апублікаваным леьась у верасні, адзначалася, што Беларусь з’яўляецца адной з краін, у якіх “дакументальна пацверджаная палітыка ці схема гандлю людзьмі”.

У спісе краін, дзе зафіксаваныя “гандаль людзьмі ў рамках праграм, што фінансуюцца ўладамі, прымусовая праца ў сферы звязаных з дзяржавай медыцынскіх паслуг ды іншых сектарах, сексуальнае рабства, выкарыстанне або вербаванне дзяцей у якасці салдат”, апрача Беларусі фігуравалі Афганістан, Іран, Кітай, Камбоджа, КНДР, Куба, Расія, Паўночная Карэя, Сірыя (з пазнакай “рэжым Асада”), Судан, Эрытрэя, Паўднёвы Судан.

“Надзвычай уразлівымі для гандлю людзьмі” ў дакладзе былі названыя ўкраінскія дзеці, якіх улады ў Мінску перапраўляюць на беларускую тэрыторыю.

Паведамлялася, што беларускія ўлады “працягваюць садзейнічаць нелегальнай міграцыі ў Латвію, Літву і Польшчу”, а таксама “ўезду ў Беларусь тысяч мігрантаў і асоб, што шукаюць прытулку, з краін Блізкага Усходу, краін Афрыкі на поўдзень ад Сахары і Цэнтральнай Азіі”. Гэтыя мігранты і асобы, што шукаюць прытулку, “застаюцца ўразлівымі да гандлю людзьмі”.

У дакладзе гаварылася, што на працягу справаздачнага перыяду (з красавіка 2024 года па сакавік 2025-га) у Беларусі “існавала дзяржаўная палітыка або сістэма прымусовай працы ў дзяржаўных “цэнтрах працоўнай тэрапіі” (гаворка пра лячэбна-працоўныя прафілакторыі, ЛПП). “Улады прымушалі тысячы людзей з наркатычнай або алкагольнай залежнасцю, а таксама палітычных зняволеных” выконваць у ЛПП “шырокі спектр работ”; у 2024 годзе “ў іх утрымлівалася не менш за 10.852 чалавек”.

Паводле звестак Дзярждэпартамента, беларускі ўрад “знізіў актыўнасць праваахоўных органаў па барацьбе з гандлем людзьмі”. Адзначалася, што ў 2024 годзе ўлады не паведамлялі пра правядзенне расследаванняў або пераслед па злачынствах, звязаных з гандлем людзьмі. Пры гэтым даныя за 2023 год раскрываліся — 79 расследаванняў і судовы пераслед па 38 справах у рамках арт. 171 (арганізацыя, выкарыстанне занятку прастытуцыяй альбо стварэнне ўмоў для занятку прастытуцыяй) і арт. 171¹ (уцягванне ў занятак прастытуцыяй альбо прымус да працягу занятку прастытуцыяй).

!Ужо чацвёрты год запар урад не паведамляе пра вынясенне абвінаваўчых прыгавораў ніводнаму гандляру людзьмі паводле арт. 181 (гандаль людзьмі) або 181¹ (выкарыстанне рабскай працы)”, — гаварылася ў дакладзе.

Паведамлялася, што “на тэрыторыі Беларусі былі выяўленыя ахвяры трафікераў — беларусы, малдаване, расіяне, украінцы, в’етнамцы, ганцы. Большасць гандляроў людзьмі — беларускія грамадзяне”.

Дзярждэпартамэнт рэкамендаваў уладам Беларусі спыніць выкарыстанне прымусовай працы ў ЛПП; актыўна расследаваць і пераследаваць у судовым парадку злачынствы, звязаныя з гандлем людзьмі; павялічыць аб’ём рэсурсаў, выдзеленых на дапамогу і абарону ахвярам гандлю людзьмі ў Беларусі; наладзіць супрацоўніцтва з НДА, што аказваюць дапамогу ахвярам гандлю людзьмі.

Амерыканскае ведамства таксама рэкамендавала “спыніць арганізаваную перадачу ўкраінскіх дзяцей у Беларусь” і зрабіць усе неабходныя захады для “прадухілення гандлю людзьмі сярод гэтай групы насельніцтва, у тым ліку шляхам гарантавання бяспечнага вяртання гэтых дзяцей да бацькоў або апекуноў”.

Дзярждэп палічыў мэтазгодным “растлумачыць у крымінальным заканадаўстве Беларусі, што за мірнае выказванне палітычных поглядаў не могуць прымяняцца пакаранні, звязаныя з абавязковай або прымусовай працай, і забяспечыць, каб дзеці не падвяргаліся прымусовай працы ў якасці пакарання”.

Даклад утрымліваў і іншыя рэкамендацыі, звесткі і высновы, якія пацвярджаюць абгрунтаванасць аднясення Беларусі да ліку краін, у якіх “дакументальна пацверджаная палітыка або схема гандлю людзьмі”.