Мытня спыніла ўвоз з РФ партыі імпартных тавараў амаль на 200 тыс. долараў

22 красавіка, Позірк. Аб спыненні спробы незаконнага ўвозу з Расіі “камерцыйнай партыі тавараў замежнай вытворчасці агульным коштам больш за 550 тыс. рублёў“ (195,7 тыс. долараў) паведаміла 22 красавіка прэс-служба Дзяржаўнага мытнага камітэта (ДМК).

Адзначаецца, што 12,5 тыс. адзінак тавараў перавозілася ў грузавым аўтамабілі “Фольксваген“, спыненым гомельскімі мытнікамі на беларуска-расійскім участку мяжы.

У кіроўцы, грамадзяніна Беларусі, не аказалася неабходных суправаджальных дакументаў.

У дачыненні да перавозчыка складзены адміністрацыйны пратакол паводле арт. 13.12 КаАП (парушэнне парадку набыцця, захоўвання, выкарыстання ў вытворчасці, транспарціроўкі, водпуску і рэалізацыі тавараў).

“Санкцыяй артыкула прадугледжаны штраф у памеры да 50% ад кошту прадмета адміністрацыйнага правапарушэння. У дадзеным выпадку ён складзе да 280 тыс. рублёў (99,6 тыс. долараў)“, — гаворыцца ў паведамленні.