У РФ за два дні затрымана каля 150 чалавек, абвешчаных у вышук у Беларусі

27 красавіка, Позірк. У Расіі за два дні затрымана каля 150 чалавек, абвешчаных у вышук у Беларусі, паведамляе праваабарончы цэнтр “Вясна”.

Адзначаецца, што гэта адбылося ў рамках спецыяльнага комплекснага мерапрыемства “Вышук“.

У прыватнасці, у Дагестане затрыманы 46-гадовы мінчанін, які падазраецца ў махлярстве на суму не менш за 480 тыс. рублёў і “экстрэмісцкіх злачынствах“.

У 2025 годзе Расія перадала Беларусі 225 асоб, “абвінавачаных і асуджаных за ўчыненне злачынстваў“, паведаміла раней Генеральная пракуратура РФ.

Беларусь за год экстрадавала ў Расію 33 чалавекі.

Усе гэтыя асобы, як заяўлялася, “спрабавалі ўхіліцца ад адказнасці, хаваючыся на тэрыторыі іншых дзяржаў”.

Адзначалася, што ў асноўным яны здзейснілі крадзяжы, махлярствы і рабаванні, замахі на жыццё і здароўе людзей, парушэнні парадку кіравання транспартнымі сродкамі, злачынствы супраць правасуддзя і правапарушэнні, звязаныя з бяспекай на дарогах і транспарце.

13 лютага 2024 года паведамлялася, што ў базе вышуку МУС РФ фігуруюць імёны 3.186 грамадзян і ўраджэнцаў Беларусі, да траўня ў базу дадалі яшчэ больш за 400 грамадзян Беларусі. Пасля гэтага база пастаянна папаўняецца.

У красавіку 2025 года паведамлялася, што за папярэднія пяць месяцаў на запыт беларускіх уладаў у базу вышуку МУС Расіі было ўключана больш за 1.200 грамадзян і ўраджэнцаў Беларусі. 58 з іх, як адзначалася, у Беларусі былі асуджаныя ў рамках палітычна матываваных крымінальных спраў.

У расійскай базе значацца беларускія добраахвотнікі, блогеры, журналісты, сваякі як былых палітвязняў, так і палітыкаў у эміграцыі.

У 2024 годзе ў Расіі затрыманыя 964 чалавекі, якія адшукваюцца ў Беларусі за здзяйсненне злачынстваў, паведамляў кіраўнік Міністэрства ўнутраных спраў Іван Кубракоў.