Польскі перавозчык не задэклараваў партыю крэму і будзе аштрафаваны — ДМК

12 траўня, Позірк. Гродзенскія мытнікі спынілі спробу незаконнага перамяшчэння буйной партыі тавару польскім перавозчыкам, паведаміла 12 траўня прэс-служба Дзяржаўнага мытнага камітэта.

Паводле інфармацыі ведамства, грузавы аўтамабіль “Вольва” прыбыў на афармленне ў пункт пропуску Бераставіца (з польскага боку — Баброўнікі).

“У перададзеных кіроўцам дакументах была заяўленая іншая катэгорыя касметычнай прадукцыі, сярод якой пры надглядзе знойдзены 3,5 тыс. упаковак незаяўленага крэму. Кошт такой партыі склаў каля 100 тыс. рублёў”, — гаворыцца ў паведамленні.

У дачыненні да перавозчыка распачаты адміністрацыйны працэс паводле ч. 1 арт. 15.5 КаАП (недэклараванне або прадстаўленне недакладных звестак пра тавары).

“На падставе рашэння суда ён выплаціць штраф у памеры 30% ад кошту тавару, што незаконна перамяшчаўся, і мытныя плацяжы, якіх бракуе”, — перакананая мытная служба.