Мытня прадухіліла ўвоз медыцынскіх вырабаў на 3,3 млн рублёў, груз везлі з Нідэрландаў

13 траўня, Позірк. Спробу незаконнага перамяшчэння з Нідэрландаў тавараў на суму больш за 3,3 млн рублёў прадухілілі брэсцкія мытнікі. Пра гэта 13 траўня паведаміў Дзяржаўны мытны камітэт (ДМК).

Такім чынам, як адзначаецца, на мытных плацяжах перавозчык спрабаваў зэканоміць амаль 76 тыс. рублёў.

Тавары былі выяўленыя пры даглядзе грузавіка “MAN” у пункце пропуску Казловічы (з польскага боку Кукурыкі). Аўтамабіль належыць польскаму перавозчыку.

“Ужо на вагагабарытным кантролі было ўстаноўлена, што ў паўпрычэпе знаходзіцца “лішні груз”. Фактычная вага перамяшчаных тавараў склала парадку 5,7 тоны, што на 2,2 тоны больш, чым было заяўлена ў дакументах”, — звяртае ўвагу ДМК.

Перавышэнне вагі “склалі наўмысна няўлічаныя больш за 68 тыс. адзінак розных медыцынскіх вырабаў”, гаворыцца ў паведамленні.

У дачыненні да перавозчыка распачаты адміністрацыйны працэс. Яму пагражае штраф да 30% ад кошту прадмета правапарушэння.