Рассельгаснагляд не ўпусціў і ўтылізаваў 5 тон беларускай мясамалочнай прадукцыі

13 траўня, Позірк. Аб утылізацыі каля 5 тон розных гатовых мясных і малочных прадуктаў, вырабленых беларускімі прадпрыемствамі, паведаміла 13 мая Федэральная служба Расіі па ветэрынарным і фітасанітарным наглядзе (Рассельгаснагляд).

Упраўленне службы па Бранскай, Смаленскай і Калужскай абласцях інфармавала, што ім пры садзейнічанні супрацоўнікаў Бранскай мытні 7 траўня 2026 года былі спыненыя дзве аўтамашыны пад кіраваннем расійскіх і беларускіх грамадзян, якія перавозілі згаданую прадукцыю.

“Як высветлілася ў ходзе праверкі, прадукты былі набытыя перавозчыкам на прадпрыемствах гандлю Мінскай і Гомельскай абласцей, якія не ўнесеныя ў Рэестр мытнага саюза, які дае ім права экспарту ў Расійскую Федэрацыю. Таксама ўстаноўлена, што транспарціроўка грузу ажыццяўлялася без ветэрынарных суправаджальных дакументаў, у прыстасаванай аўтамашыне з грубымі парушэннямі ветэрынарна-санітарных правілаў перавозкі прадукцыі жывёльнага паходжання“, — гаворыцца ў паведамленні.

Паводле рашэння Рассельгаснагляду “небяспечная прадукцыя ўтылізаваная ва ўстаноўленым парадку”, перавозчыкі прыцягнутыя да адміністрацыйнай адказнасці.

12 траўня Рассельгаснагляд паведаміў аб вяртанні ў Беларусь каля 1,6 тоны розных гатовых мясных і малочных прадуктаў, вырабленых беларускімі прадпрыемствамі. Прэтэнзіі да прадукцыі былі тыя ж, што і ў апісаным вышэй выпадку, аднак тады яна была не знішчаная, а вернутая.

Аналагічны выпадак — з тымі ж прэтэнзіямі Рассельгаснагляду — быў зафіксаваны 27 красавіка. Тады гаворка ішла пра “600 кг розных гатовых мясных і малочных прадуктаў беларускай вытворчасці“, набытых перавозчыкам на адным з прадпрыемстваў гандлю Гомельскай вобласці. Тады груз таксама вярнулі ў Беларусь.