Яшчэ 11 чалавек унесена ў “спіс асоб, якія маюць дачыненне да экстрэмісцкай дзейнасці“

22 траўня, Позірк. Яшчэ 11 чалавек дадало МУС у “спіс асоб, якія маюць дачыненне да экстрэмісцкай дзейнасці“ 22 траўня. Цяпер у пераліку на сайце ведамства 6.631 пазіцыя.

Чатыры чалавекі ўключаныя з пазнакай “адбывае пакаранне”: Вольга Строева (асуджаная паводле арт.130, 361, 361⁴ і 368 КК; прызнаная палітвязнем), Дзмітрый Жук (361⁴), Сяргей Рыбалёў (361⁴, 369) і Вадзім Худоба (368).

Сем чалавек унесена ў пералік з пазнакай “судзімасць не пагашаная“, што звычайна сведчыць аб пакаранні, не звязаным з пазбаўленнем волі. Гэта Аляксандр Новікаў, Дзмітрый Салановіч, Сяргей Шведаў, Ангеліна Лі, Максім Давідовіч, Аляксандр Безвушчонак і Яўген Жукавец, асуджаныя пераважна паводле арт. 361⁴ КК.

Даведка “Позірку”:

арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 361 — заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы;

арт. 361⁴ — садзейнічанне экстрэмісцкай дзейнасці;

арт. 368 — абраза прэзідэнта, у т.л. які спыніў выкананне сваіх паўнамоцтваў;

арт. 369 — абраза прадстаўніка ўлады.