У Гомелі затрыманы п’яны кіроўца, які перавозіў 19 падлеткаў

3 чэрвеня, Позірк. У Гомелі затрыманы п’яны 39-гадовы магілёвец, які прывёз у абласны цэнтр экскурсійную групу з 19 падлеткаў, паведамляе Міністэрства ўнутраных спраў.

Адзначаецца, што спачатку кіроўца ў гутарцы з інспектарам Дзяржаўтаінспекцыі адмаўляў ужыванне спіртных напояў, аднак праверка паказала наяўнасць больш за 1 праміле алкаголю ў крыві.

Акрамя таго, затрыманы не меў дазволу на перавозку арганізаванай групы дзяцей. Кіроўца пазбаўлены правоў на 5 гадоў і аштрафаваны на 200 базавых велічынь (9 тыс. рублёў).

За допуск нецвярозага работніка да ўдзелу ў дарожным руху перавозчык прыцягнуты да адміністрацыйнай адказнасці.

Школьнікам былі прадастаўленыя новы аўтобус і кіроўца, які даставіў іх дадому.

У 2025 годзе было выяўлена 11.850 кіроўцаў у стане ап’янення.