Вынесены прыгавор за “дзяржздраду” сям’і Корсакавых: бацькі асуджаныя на 14 і 12 гадоў зняволення, дачка, якая жыве ва Украіне, — на 11

11 чэрвеня, Позірк. Мінскі гарадскі суд 10 чэрвеня вынес прыгавор па справе сям’і Корсакавых, паведамляе праваабарончы цэнтр “Вясна”.

Пелагея Корсакава, якая пражывае ва Украіне, прыгавораная завочна да 11 гадоў пазбаўлення волі.

Яе бацькі — Дзмітрый і Таццяна Корсакавы — асуджаныя адпаведна на 14 і 12 гадоў зняволення, паведамляе выданне “Салідарнасць”. Яны знаходзяцца ў няволі.

Праваабаронцы адзначаюць, што Таццяне Корсакавай 57 гадоў. Паводле звестак аб’яднання BelPol, яна працавала выхавальніцай у мінскім дзіцячым садку № 518.

58-гадовы Дзмітрый Корсакаў працаваў у тым жа садку рабочым. Раней займаўся аўтабізнесам — дастаўляў з-за мяжы аўтамабілі на продаж.

28-гадовая Пелагея Корсакава раней таксама працавала дашкольным педагогам.

Раней паведамлялася, што Дзмітрыю і Таццяне Корсакавым інкрымінаваныя ч. 1 арт. 356 (здрада дзяржаве), ч. 4 арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), ч. 3 арт. 333¹ (незаконнае перамяшчэнне праз мяжу атрутных рэчываў, агнястрэльнай зброі, боепрыпасаў, выбуховых рэчываў) КК.

Пелагея абвінавачвалася паводле ч. 1 арт. 356 КК.

Падрабязнасці крымінальнай справы невядомыя.

Беспрэцэдэнтныя палітычныя рэпрэсіі працягваюцца ў Беларусі з 2020 года.