Няшчасны выпадак у шахце “Беларуськалія” — адзін чалавек загінуў, двое траўмавана
12 чэрвеня, Позірк. Няшчасны выпадак са смяротным вынікам здарыўся 11 чэрвеня на рудніку 3-га рудаўпраўлення “Беларуськалія” ў Салігорску (Мінская вобласць), паведаміла прэс-служба прадпрыемства.
Адзначаецца, што на глыбіні 620 метраў разбурылася дзвярная салебетонная перамычка, якую ў гэты момант акурат узводзілі.
У выніку быў “смяротна траўмаваны мацавальнік ПУВ і БВР рудніка 1975 г.н., атрымалі траўмы трактарыст участка 1991 г.н. і навучэнец Салігорскага горна-хімічнага каледжа, які праходзіць навучальную практыку на рудніку”. Пацярпелым “аказаная неабходная медыцынская дапамога”.
Прычыны і абставіны няшчаснага выпадку высвятляюцца.
Кіраўніцтва прадпрыемства прынесла “глыбокія спачуванні родным і блізкім загінулага работніка”.
31 кастрычніка 2025 года “Беларуськалій” паведаміў пра ўцечку салянай кіслаты на прадпрыемстве. У выніку разрыву пустой ёмістасці з-пад салянай кіслаты пацярпела маладая жанчына і трое мужчын, яны атрымалі апёкі.
3 лістапада 2023 года на 2-м рудаўпраўленні прадпрыемства пацярпела пяць работнікаў рамонтнай брыгады электраслесараў. У здарэнні быў абвінавачаны 44-гадовы дзяжурны майстар “Беларуськалія”.
30 траўня 2021 года на рудніку “Беларуськалія” загінуў рабочы.
У красавіку 2026 года намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два. Паводле яго слоў, у 2025-м зафіксаваны гістарычны мінімум колькасці смяротных выпадкаў на працы — 103.
Паводле даных Мінпрацы, асноўны фактар траўматызму — недапрацоўка наймальніка (недастатковая падрыхтоўка рабочых месц, адсутнасць распрацаваных інструкцый, навучання ды інш.).
