Украіна і Расія восьмы раз з пачатку года абмяняліся ваеннапалоннымі праз Беларусь

26 чэрвеня, Позірк. Украіна і Расія 26 чэрвеня перадалі адзін аднаму па 160 ваеннапалонных, вынікае з інфармацыі афіцыйных крыніц Кіева і Масквы.

Міністэрства абароны РФ традыцыйна паведаміла, што “расійскія вайскоўцы знаходзяцца на тэрыторыі Рэспублікі Беларусь, дзе ім аказваецца неабходная псіхалагічная і медыцынская дапамога”.

Прэзідэнт Украіны Уладзімір Зяленскі паведаміў, што вызваленыя 160 вайскоўцаў, якія знаходзіліся ў палоне з 2022 года.

Сярод вызваленых — вайскоўцы Узброеных сіл Украіны, Дзяржаўнай спецыяльнай службы транспарту, прадстаўнікі Нацыянальнай гвардыі, памежнікі.

Паводле слоў Зяленскага, яны “абаранялі Украіну ў Марыупалі і на “Азоўсталі”, на Данецкам, Луганскім, Харкаўскім, Запарожскім, Кіеўскім, Чарнігаўскім і Сумскім кірунках”.

Гэта восьмы з пачатку года абмен украінскімі і расійскімі палоннымі праз тэрыторыю Беларусі. Першы ў 2026 годзе абмен ваеннапалоннымі паміж Украінай і РФ праз Беларусь адбыўся 5 лютага (157 чалавек з кожнага боку), другі — 5 сакавіка (па 200), трэці — 6 сакавіка (па 300), чацвёрты — 11 красавіка (па 175 ваенных і 7 грамадзянскіх), пяты — 24 красавіка (па 193 ваенных), шосты — 15 траўня (па 205 ваенных), сёмы — 5 чэрвеня (па 185 ваенных).

12 красавіка ў праграме “Галоўны эфір” на тэлеканале “Беларусь 1” выйшаў рэпартаж, з якога вынікае, што вызваленыя з украінскага палону расійскія вайскоўцы праходзяць лячэнне ў Гомелі.