З пачатку года ў вадаёмах патанула 7 дзяцей і 103 дарослых — Генпракуратура
8 ліпеня, Позірк. З пачатку 2026 года ў вадаёмах патанула 7 непаўналетніх (8 у 2025 годзе за той жа перыяд) і 103 дарослых (130), паведаміў намеснік начальніка галоўнага ўпраўлення — начальнік упраўлення па наглядзе ў сацыяльнай сферы Генеральнай пракуратуры Павел Зайцаў на прэс-канферэнцыі ў Мінску 8 ліпеня.
Паводле яго слоў, гібель дарослых звязаная найчасцей з купаннем у не прызначаных для гэтага месцах, а таксама са знаходжаннем у вадзе ў алкагольным ап’яненні.
З 1 траўня, згодна з інфармацыяй Генпракуратуры, ад адміністрацыйнай адказнасці па арт. 24.42 КаАП за купанне ў забароненых месцах рэк, азёр ці іншых вадаёмаў вызвалена больш за 1.500 грамадзян. Ім вынесеныя папярэджанні.
Зайцаў адзначыў, што праводзіцца кантроль уладкавання і ўтрымання пляжаў, падчас якога выяўляюцца несвоечасовая ачыстка акваторый ад надводнай расліннасці, праблемы з вывазам дробных бытавых адходаў, уборкай і дэзінфекцыяй туалетаў, іншыя парушэнні санітарных нормаў. Па ўсіх парушэннях заканадаўства ўнесена 132 акта нагляду, у тым ліку чатыры прадстаўленні ў аблвыканкамы.
