Літоўскія памежнікі перахапілі яшчэ два дроны з Беларусі з кантрабанднымі цыгарэтамі
10 ліпеня, Позірк. Два беспілотнікі, якія прыляцелі з Беларусі з грузам кантрабандных цыгарэт, перахопленыя ў Шальчынінкскім раёне, паведаміла Служба аховы дзяржаўнай мяжы Літвы (САДМ).
Інцыдэнт здарыўся ў ноч на 9 ліпеня. Адзначаецца, што памежнікі Падваронскай заставы з дапамогай сістэмы відэаназірання заўважылі некалькі дронаў, якія перасякалі мяжу з боку Беларусі.
У раён меркаванага парушэння накіравалі патруль са спецыяльным антыдронавым абсталяваннем. Пасля блакавання палётаў пачаліся пошукі БПЛА.
Абодва дроны выяўленыя ў лесе. Усяго яны пераносілі 2 тыс. пачкаў цыгарэт Queen Menthol з беларускімі акцызнымі маркамі. Кошт партыі склаў 10.920 еўра.
Распачатае дасудовае расследаванне. Адзначаецца, што за такое злачынства ў Літве прадугледжаны штраф альбо пазбаўленне волі да чатырох гадоў.
Паводле звестак САДМ, з пачатку года літоўскія памежнікі перахапілі 33 беспілотнікі, якія выкарыстоўваліся для дастаўкі кантрабанды з Беларусі. За ўвесь 2025 год перахоплена 59 такіх апаратаў, у 2024 годзе — 54.
Апошні раз аб перахопе дрона з кантрабандай (31-га з пачатку года) САДМ інфармавала 9 ліпеня. 7 ліпеня ведамства паведаміла, што памежнікі ўпершыню перахапілі ў адным месцы чатыры дроны з беларускімі цыгарэтамі.
