Дэмструктуры дамовіліся аб стварэнні пастаяннай працоўнай групы па пытаннях бяспекі

11 ліпеня, Позірк. Аб стварэнні пастаяннай працоўнай групы па пытаннях бяспекі дамовіліся беларускі дэмакратычны лідар Святлана Ціханоўская, прадстаўнікі яе офіса, Аб’яднанага пераходнага кабінета (АПК), Каардынацыйнай рады, арганізацыі BelPol і міжнароднай экспертнай ініцыятывы iSANS.

Як паведаміла прэс-служба АПК, падчас сустрэчы бакі абмеркавалі пытанні, “звязаныя з магчымай эскалацыяй вакол Беларусі”. “Асобная ўвага” была нададзеная аналізу сітуацыі ў сферы рэгіянальнай бяспекі.

“Удзельнікі адзначылі, што на сёння існуе шэраг прыкмет, якія могуць сведчыць пра падрыхтоўку рэжыму [прэзідэнта Расіі Уладзіміра] Пуціна да чарговага этапу эскалацыі. У сувязі з гэтым была выказаная ацэнка, што існуе высокая верагоднасць уцягвання тэрыторыі Беларусі і рэжыму [Аляксандра] Лукашэнкі ў гэты сцэнар”, — гаворыцца ў паведамленні.

На нарадзе былі таксама разгледжаныя пытанні падтрымкі беларускіх добраахвотнікаў і камунікацыі з міжнароднымі партнёрамі. “Асобны акцэнт” быў зроблены на “неабходнасці ўзмацнення працы з Украінай, а таксама на абмеркаванні таго, якім чынам беларускія дэмакратычныя сілы могуць аказваць Украіне практычную дапамогу”.

Святлана Ціханоўская наведвала Украіну сёлета 25–26 траўня.