Лукашэнка — артыстам: Не лезьце вы ў гэтую палітыку, каб яе чорт узяў
16 ліпеня, Позірк. “Не лезьце вы ў гэту палітыку, каб яе чорт узяў”, — сказаў Аляксандр Лукашэнка, звяртаючыся да артыстаў 16 ліпеня на адкрыцці “Славянскага базару ў Віцебску”.
“Рабіце сваю справу, цешце людзей, — заклікаў ён. — Радасных дзён у вас, у нас не так ужо шмат. Таму тое, што будзе адбывацца на гэтым маленькім пятачку ў Віцебску, з’яўляецца абнадзейвальным. Гэта нашае жыццё, гэта нашая будучыня. Тварыце, стварайце. Наколькі магчыма мы будзем вам дапамагаць”.
“Ведаеце, дзе б вы ні былі — у Афрыцы, у Амерыцы, <…> у Еўразіі, вы ведаеце, Беларусь — гэта мірная выспачка, дзе вы знойдзеце заўсёды, як у нас кажуць, прытулак, дзе вы заўсёды знойдзеце пляцоўку для таго, каб на ўвесь свет заявіць, што мастацтва — гэта і ёсць мір, шчасце, здароўе. Поспехаў вам, жывіце доўга і радуйцеся”, — дадаў спікер.
Адметна, што на адкрыцці фестывалю быў прадэманстраваны відэазапіс выступу Лукашэнкі 35-гадовай даўніны, які ён пракаментаваў. Палітык падкрэсліў свой асабісты ўнёсак у захаванне гэтага культурніцкага мерапрыемства.
Лукашэнка таксама сказаў, што мастацтва “сёння патрэбнае ў нашай славянскай сям’і, у нашай садружнасці”.
Варта адзначыць, што на адкрыцці “Славянскага базару” некалькі разоў гучала ўкраінская мова. Адна з вядоўцаў павіталася па-ўкраінску, таксама быў выкананы фрагмент украінскай песні. Украіну ў кантэксце славянскіх народаў згадваў і Лукашэнка.
Разам з тым Украіна не бярэ ўдзел у фестывалі ўжо на працягу многіх гадоў. Афіцыйная дэлегацыя і артысты з гэтай краіны перасталі наведваць мерапрыемства пасля 2014 года. Тым больш гэта не адбываецца ў апошнія гады, калі фармат фестывалю цалкам арыентаваны на супрацу ў рамках Саюзнай дзяржавы Беларусі і Расіі.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.
Масавыя палітычныя рэпрэсіі, якія рэжым Лукашэнкі разгарнуў пасля брутальнага задушэння пратэстаў, выкліканых фальсіфікацыяй выбараў 2020 года і жорсткасцю сілавікоў, не спыняюцца дагэтуль.
Нацыянальная культура знаходзіцца пад прэсам цэнзуры і ідэалёгіі. Беларуская мова ўсё больш сыходзіць на другі план пасля рускай.
Паводле інфармацыі “Беларускай Рады культуры”, з 2020 года і да канца чэрвеня 2026-га рэпрэсіі ў Беларусі зазнала сама меней 117 дзеячаў культуры. Не менш як 82 з іх прыгаворана да пазбаўлення або абмежавання волі, яшчэ восем на канец справаздачнага перыяду была пад следствам. У астатніх выпадках вырак невядомы.
Акрамя таго, у Беларусі існуе спіс забароненых артыстаў ды іншых дзеячаў культуры. Нехта з іх мяняе прафесію, нехта эмігруе.
Міжнародны фестываль мастацтваў “Славянскі базар у Віцебску” праходзіць з 1992 года, сёлета — 35-ы раз. У праграме сёлетняга фестывалю (16–19 ліпеня) прадстаўленыя розныя сферы творчасці— ад музыкі да выяўленчага мастацтва. Традыцыйна мае праўладную і прарасійскую скіраванасць.
МУС правядзе на "Славянскім базары" паказальныя выступленні спецпадраздзяленняў і дзяцей з ваенна-патрыятычных клубаў
8 ліпеня, Позірк. Міністэрства ўнутраных спраў анансавала правядзенне ў рамках "Славянскага базару" ў Віцебску акцыі "За бяспеку — разам". Паведамляецца, што 10–13 ліпеня адбудуцца "паказальныя выступленні спецпадраздзяленняў МУС і выхаванцаў ваенна-патрыятычных клубаў", і, у прыватнасці, "эмацыйнае спаборніцтва — "Забег у …
На думку ідэолагаў, "кожны беларус" лічыць "Славянскі базар" найбольш вядомым культурным мерапрыемствам, якое ведаюць ва ўсім свеце
24 траўня, Позірк. Беларусы лічаць "Славянскі базар" найбольш вядомым культурным мерапрыемствам, якое ведаюць ва ўсім свеце. Такое сцвярджэнне змяшчаецца ў матэрыялах да травеньскага “адзінага дня інфармавання насельніцтва“, якія падрыхтаваў НДІ тэорыі і практыкі дзяржаўнага кіравання Акадэміі кіравання для інфармацыйна-прапагандысцкіх груп. …
