Ва ўсіх раёнах Беларусі ўведзеныя абмежаванні на наведванне лясоў

17 ліпеня, Позірк. Абмежаванні на наведванне лясоў уведзеныя ва ўсіх 118 раёнах Беларусі, сведчыць актуальная інтэрактыўная карта на сайце Міністэрства лясной гаспадаркі.

Суткамі раней свабодна наведваць лес можна было ў сямі раёнах Гомельскай вобласці — Веткаўскім, Гомельскім, Добрушскім, Кармянскім, Лоеўскім, Кастрычніцкім і Чачэрскім; пяці раёнах Магілёўскай вобласці — Клімавіцкім, Касцюковіцкім, Крычаўскім, Мсціслаўскім і Хоцімскім; а таксама трох раёнах Гродзенскай вобласці — Астравецкім, Ашмянскім і Смаргонскім.

Абмежаванні азначаюць, што ў лясы нельга заязджаць на аўтамабілі і разводзіць там вогнішчы, але даступныя пешыя прагулкі, збор ягад і грыбоў.

З-за гарачага надвор’я абвешчаны аранжавы ўзровень небяспекі. Паводле даных Белгідрамета, тэмпература паветра 17, 18 і 19 ліпеня падымецца да 30-32 градусаў.