Пацярпелыя на пажары ў псіхіятрычнай бальніцы Гродна знаходзяцца на ШВЛ, пашкоджана 30–60% цела — урач

20 ліпеня, Позірк. Усе шасцёра пацярпелых 19 ліпеня на пажары ў Гродзенскім абласным клінічным цэнтры “Псіхіятрыя — наркалогія” знаходзяцца ў стабільна цяжкім стане, паведаміў в.а. загадчыка апёкавага аддзялення Гродзенскай абласной бальніцы хуткай меддапамогі (БХМД) Аляксандр Архуціч (на падставе відэакаментарыю, апублікаванага 20 ліпеня выданнем “Гродзенская праўда”).

Паводле яго слоў, пацыенты размешчаныя ў аддзяленні рэанімацыі БХМД. У людзей абпалена ад 30 да 60% паверхні цела, акрамя таго, яны атрымалі тэрмаінгаляцыйную траўму і знаходзяцца на штучнай вентыляцыі лёгкіх. Урач канстатаваў, што прагназаваць іх стан немагчыма, бо “апёкавая хвароба непрадказальная”.

Намеснік галоўнага ўрача цэнтра “Псіхіятрыя — наркалогія” Таццяна Буднік паведаміла, што “бальніца працуе ў штатным рэжыме”. “Мы ліквідуем наступствы пажару — пашкоджана маёмасць у адной палаце. Мы працягваем прымаць пацыентаў. Сітуацыя на асабістым кантролі міністра аховы здароўя Аляксандра Хаджаева і кіраўніка рэгіёну Юрыя Караева”, — сказала яна.

19 ліпеня стала вядома, што “ўначы ратавальнікам паступіла паведамленне пра задымленне ва ўстанове аховы здароўя па вуліцы Абухава” (назву медустановы пазней паведаміла Мінздароўя).

“Падраздзяленні МНС, якія прыбылі да месца пажару, высветлілі, што ачаг узгарання знаходзіўся ў адной з палат на пятым паверсе шасціпавярховага будынка”, — адзначала ведамства.

Паводле інфармацыі МНС, работнікі бальніцы, “адрэагаваўшы на пах гару”, разам з міліцыянерамі “выратавалі 5 чалавек <…> з палаты, што гарэла”, сярод іх ніхто не пацярпеў.

“З выкарыстаннем адмысловых масак для абароны органаў дыхання з небяспечнай зоны работнікі МНС выратавалі яшчэ 6 чалавек, якія былі шпіталізаваны”, — гаварылася ў паведамленні міністэрства.

З будынка бальніцы былі эвакуяваныя 254 чалавекі, у тым ліку 10 дзяцей. Ніхто з іх не пацярпеў.

Тушыць пажар прыбыло 15 адзінак тэхнікі МНС.

12 снежня 2019 года ў псіхіятрычным шпіталі ў аграгарадку Жодзішкі (Смаргонскі раён Гродзенскай вобласці) здарыўся пажар, у выніку якога загінула двое пацыентаў.

Узгаранне пачалося ў фае другога паверха праз няспраўнасць тэлевізара, што прывяло да моцнага задымлення будынка. Персанал установы аператыўна эвакуяваў 49 пацыентаў.

Гэтае здарэнне выклікала шырокі грамадскі рэзананс і паслужыла падставай для пастрожвання патрабаванняў да пажарнай бяспекі ў сацыяльных установах краіны.