За захоўванне зброі да абмежавання волі асуджаны жыхар Івацэвічаў
21 ліпеня, Позірк. 60-гадовы жыхар Івацэвічаў (Брэсцкая вобласць) прыгавораны да двух гадоў абмежавання волі з накіраваннем у папраўчую ўстанову адкрытага тыпу (ПУАТ), паведамляе Генеральная пракуратура.
Мужчына прызнаны вінаватым паводле ч. 2 арт. 295 Крымінальнага кодэкса (незаконнае абарачэнне зброі, боепрыпасаў, выбуховых рэчываў і выбуховых прылад).
Паведамляецца, што абвінавачаны ў 2010 годзе знайшоў ручную гладкаствольную зброю, вырабленую самаробным спосабам з 4,5-міліметровай спружынна-поршневай пнеўматычнай вінтоўкі мадэлі “ІЖ-22”. Таксама ён знайшоў 15 спартыўна-паляўнічых вінтовачных патронаў заводскага вырабу. Боепрыпасы і зброю ён з таго часу захоўваў дома.
Акрамя названага арсенала, у мужчыны дома захоўвалася гладкаствольная паляўнічая стрэльба.
У 2026 годзе названыя прадметы былі знойдзены супрацоўнікамі міліцыі пры ператрусе.
Фігурант, як сцвярджаецца, ведаў, што за захоўванне зброі і боепрыпасаў прадугледжана крымінальная адказнасць.
Генпракуратура нагадала, што няўлічаную зброю можна здаць у тэрытарыяльнае падраздзяленне органаў унутраных спраў. Асобы, якія добраахвотна зрабілі гэта, вызваляюцца ад адказнасці.
16 ліпеня паведамлялася, што ў дачыненні да 48-гадовага жыхара Глыбоцкага раёна (Віцебская вобласць) распачата крымінальная справа паводле ч. 2 арт. 295 КК. Пасля смерці свайго бацькі ў 2019 годзе мужчына знайшоў агнястрэльную наразную зброю, “прызначаную і прыдатную для стральбы“, а таксама 87 “вырабленых завадскім спосабам“ патронаў да яго.
30 чэрвеня паведамлялася, што ўладальнік “незаконнага арсенала” з Магілёва паводле рашэння пракурора ўзяты пад варту.
17 чэрвеня УУС Брэсцкага аблвыканкама паведамляла аб канфіскацыі вялікага арсенала агнястрэльнай зброі ў пенсіянера ў Камянцы.
