У грузавым цягніку, які рухаўся з Беларусі, польскія мытнікі выявілі кантрабандныя цыгарэты
22 ліпеня, Позірк. Супрацоўнікі Мытна-падатковай службы Польшчы сумесна з прадстаўнікамі Памежнай аховы выявілі кантрабандныя цыгарэты ў грузавым цягніку, які рухаўся з Беларусі праз пункт пропуску Цярэспаль (з сумежнага боку — Брэст).
Як паведамляе Палата падатковай адміністрацыі ў Любліне, 350 пачкаў цыгарэт былі знойдзены “у старанна абсталяванай схованцы”. Іх рыначны кошт склаў звыш 7,2 тыс. злотых (каля 1,9 тыс. долараў).
“Ніхто з членаў цягніковай брыгады не прызнаўся ва ўтойванні кантрабанднага тавару. Цыгарэты былі канфіскаваныя, а па даным факце распачатая крымінальная падатковая вытворчасць у дачыненні да неўстаноўленай асобы”, — гаворыцца ў паведамленні.
12 чэрвеня Памежная ахова Польшчы паведаміла аб затрыманні 7 грамадзян Польшчы, Літвы і Арменіі. Група “арганізоўвала кантрабандную дастаўку цыгарэт з Беларусі праз Літву ў Польшчу, а потым іх далейшае распаўсюджванне на тэрыторыі Еўрапейскага саюза“. Канфіскавана 6,5 млн пачкаў нелегальных цыгарэт коштам звыш 94 млн злотых (25,7 млн долараў).
19 чэрвеня памежная служба паведаміла аб затрыманні членаў арганізаванай злачыннай групы, якая ў 2023–2026 гадах выпусціла на ўнутраны рынак больш за 800 тыс. пачкаў нелегальных цыгарэт з рынкавым коштам больш за 16,5 млн злотых (больш за 4,4 млн долараў). Страты праз нявыплачаныя мытныя пошліны, акцызны падатак і ПДВ ацэнены больш як у 28 млн злотых (7,5 млн долараў), гаворыцца ў рэлізе.
