Падпісана пагадненне аб электронным гандлі таварамі ў ЕАЭС
7 жніўня, Позірк. Кіраўнікі ўрадаў краін Еўразійскага эканамічнага саюза ў рамках 47-га пасяджэння міжурадавага савета падпісалі Пагадненне аб электронным гандлі таварамі ў ЕАЭС, паведамляе прэс-служба Еўразійскай эканамічнай камісіі (ЕЭК).
Як адзначаецца, дакумент закладвае “агульную прававую аснову” для ажыццяўлення электроннага гандлю ў саюзе, забяспечваючы не толькі “празрыстасць і справядлівасць рэгулявання для бізнесу”, але і “эфектыўнасць абароны правоў спажыўцоў”.
На думку міністра ЕЭК па гандлі Андрэя Сляпнёва, такі міжнародны дагавор неабходны для стварэння “прадказальнага асяроддзя, накіраванага на развіццё электроннага гандлю і падтрыманне свабоды руху тавараў на ўсёй прасторы саюза”, а таксама для “прадухілення ўзнікнення магчымых бар’ераў”.
Заяўляецца, што пагадненне ў першую чаргу накіравана на забеспячэнне “выканання правоў і законных інтарэсаў удзельнікаў узаемнага электроннага гандлю, а таксама на вызначэнне правілаў узаемадзеяння паміж імі і ўстанаўлівае ў тым ліку патрабаванні да парадку дасудовага ўрэгулявання спрэчак паміж удзельнікамі электроннага гандлю, умовы і тэрміны вяртання грашовых сродкаў”. Таксама дакумент устанаўлівае “ўмовы вяртання тавару, у прыватнасці, фіксуе адзіны 14-дзённы тэрмін вяртання тавараў належнай якасці”.
Акрамя таго, вызначаюцца падыходы па ўжыванні электроннага дакументазвароту ў электронным гандлі ў рамках ЕАЭС, а таксама “забеспячэнні абароны даных і інфармацыйнай бяспекі”. Замацоўваюцца патрабаванні да рэкламных рассылак, прадугледжваецца “фарміраванне рэестра тавараў, якія забароненыя або абмежаваныя да рэалізацыі праз інтэрнэт у краінах саюза ў адпаведнасці з іх заканадаўствам”.
Пасяджэнне праходзіла 6–7 жніўня ў Чалпон-Аце (Кыргызстан) у вузкім і пашыраным складах.
ЕАЭС — арганізацыя рэгіянальнай эканамічнай інтэграцыі, якая валодае міжнароднай правасуб’ектнасцю. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), Арменія (з 2 студзеня 2015 года) і Кыргызстан (з 12 жніўня 2015 года).
Краіны-назіральнікі — Іран, Куба, Малдова, Узбекістан. Пагадненне аб зоне свабоднага гандлю з ЕАЭС падпісалі В’етнам, Іран, Сербія і Сінгапур.
