У Асіповіцкім раёне ў ДТЗ загінуў кіроўца “Лады” з расійскімі нумарамі, дзяўчына-пасажыр у рэанімацыі

12 жніўня, Позірк. 63-гадовы кіроўца аўтамабіля “Лада“ загінуў у выніку дарожна-транспартнага здарэння на 32-м кіламетры аўтадарогі Асіповічы — Баранавічы ў Асіповіцкім раёне (Магілёўская вобласць), паведамляе Следчы камітэт.

Паводле папярэдніх звестак, мужчына, рухаючыся на закругленні, не даў рады кіраванню, выехаў на паласу сустрэчнага руху і сутыкнуўся з грузавым МАЗам з прычэпам.

Кіроўца “Лады” памёр у машыне хуткай дапамогі. Два яго пасажыры — дзяўчаты 20 і 18 гадоў — былі дастаўленыя ў бальніцу. Пасля абследавання 20-гадовая адпушчаная на амбулаторнае лячэнне. 18-гадовая ў рэанімацыі. Яе стан ацэньваецца як стабільна цяжкі.

На відэазапісы СК да з’яўлення рэтушы можна разгледзець, што на “Ладзе“ расійскі рэгістрацыйны нумар (Смаленская вобласць).

Асіповіцкі раённы аддзел Следчага камітэта ўзбуджана крымінальную справу па ч. 2 арт. 317 Крымінальнага кодэкса (парушэнне правілаў дарожнага руху або эксплуатацыі транспартных сродкаў, што пацягнула па неасцярожнасці смерць чалавека).

10 жніўня 58-гадовая жанчына і яе 19-гадовы сын загінулі ў дарожна-транспартным здарэнні ў Стаўбцоўскім раёне (Мінская вобласць).

9 жніўня ў ДТЗ у Смаргонскім раёне (Гродзенская вобласць) загінула 59-гадовая жанчына, на яе наехаў мапед.

Колькасць ДТЗ знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам“ аналізу звестак Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўмаваных — на 8,4% (з 3.804 да 3.483).

У студзені начальнік галоўнага ўпраўлення ДАІ МУС Віктар Ротчанкаў паведамляў, што ў 2025 годзе на 9% знізілася колькасць аварый з пацярпелымі, колькасць загінулых зменшылася на 17, з 434 да 417, аднак пры гэтым узрасла колькасць загінулых матацыклістаў (колькасць не была названая). У гэтым кантэксце Ротчанкаў звярнуў увагу на тое, што ў 2025 годзе матацыклаў у краіне было зарэгістравана на 15 тыс. больш.