У Навагрудскім раёне агонь знішчыў 1 гектар пшанічнага поля
12 жніўня, Позірк. На аб’ектах аграпрамысловага комплексу зафіксаваныя чарговыя здарэнні, вынікае з сутачнай зводкі Міністэрства па надзвычайных сітуацыях.
У выніку загарання 11 жніўня пры правядзенні сельскагаспадарчых работ у полі каля аграгарадка Нягневічы Навагрудскага раёна (Гродзенская вобласць) пашкоджаны прэс-падборшчык, знішчана 16 тон саломы ў рулонах і 1 га пшаніцы на корані.
У той жа дзень у выніку пажару ў аднапавярховай падлогавай збожжавай сушылцы ў вёсцы Зяткавічы Кармянскага раёна (Гомельская вобласць) знішчана 12 т трыцікале, пашкоджаны дах на плошчы 140 кв. м.
80 т саломы ў рулонах згарэла 10 жніўня ў полі каля аграгарадка Падстарынь Івацэвіцкага раёна (Брэсцкая вобласць), 1 т збожжа ячменю пашкоджана 9 жніўня каля вёскі Майсеева Горацкага раёна (Магілёўская вобласць), 0,171 га пасеваў азімага трыцікале згарэла на корані 6 жніўня ў полі вёскі Ятвезь Баранавіцкага раёна (Брэсцкая вобласць).
Раней Гродзенскае абласное ўпраўленне МНС адзначала, што ўборачная кампанія — “максімальна адказны перыяд”: “Пакуль механізатары вядуць жніво, работнікі службы “101” сочаць за тым, каб не проста кожны гектар быў убраны без надзвычайных здарэнняў. Таму ратавальнікі ўзмацняюць прафілактычную працу: правяраюць сельгастэхніку і зернесушыльныя комплексы, праводзяць рэйды, інструктуюць работнікаў і кантралююць выкананне патрабаванняў пажарнай бяспекі”.
Адной з галоўных задач МНС у перыяд жніва было названа недапушчэнне ўзгарання камбайнаў, трактароў, аўтамабіляў і іншай сельгастэхнікі: “Ратавальнікі правяраюць наяўнасць і спраўнасць вогнетушыцеляў, стан супрацьпажарнага абсталявання і гатоўнасць механізатараў дзейнічаць у выпадку надзвычайнай сітуацыі. Важна, каб непасрэдна ў полі заўсёды былі даступныя і спраўныя сродкі тушэння”.
Аб папярэднім загаранні тэхнікі пры правядзенні сельгасработ паведамлялася 5 жніўня: у полі каля аграгарадка Макарава (Камянецкі раён Брэсцкай вобласці) быў пашкоджаны прычапны прэс-падборшчык, а ў полі каля вёскі Памедзь (Воранаўскі раён Гродзенскай вобласці) — кормаўборачны камбайн.
З пачатку жніўня пацярпела шэсць адзінак сельгастэхнікі.
На прэс-канферэнцыі 20 ліпеня намеснік начальніка галоўнага ўпраўлення нагляду і прафілактыкі МНС Дзяніс Жукоўскі паведаміў, што “найбольш распаўсюджанымі недахопамі ў датрыманні пажарнай бяспекі [падчас сельгасработ] з’яўляюцца незабеспячэнне гатоўнасці першасных сродкаў супрацьпажарнай абароны”. “Сёлета зафіксавана ўжо 228 такіх фактаў”, — сказаў ён.
Акрамя таго, выяўлена 63 факты “незабеспячэння суправаджэння збожжаўборачнай тэхнікі пажарнай аварыйна-выратавальнай або іншай, прыстасаванай для тушэння пажараў тэхнікай”.
Згодна з праведзеным “Позіркам” аналізам даных МНС, у 2025 годзе праз пажары пацярпела або была знішчана сама меней 53 адзінкі тэхнікі. Гэта на 27,4% менш, чым за 2024 год (мінімум 73). Сёлета адзначаны 21 такі выпадак.
